आंतरराष्ट्रीय योग दिनानिमित्त देशभरात योग दिन साजरा केला जात आहे. केंद्रीय गृहमंत्री अमित शाह यांनी आज हरियाणाचे मुख्यमंत्री मनोहर लाल खट्टर यांच्यासोबत रोहतक येथे योग दिवस साजरा केला. परंतु, या ठिकाणी आलेल्या लोकांनी कार्यक्रम संपताच आणि अमित शाह जाताच खाली योगासाठी अंथरलेल्या चटई पळवल्या. चटई पळवण्यासाठी लोकांमध्ये झुंबड पाहायला मिळाली. चटई घेऊन जाऊ नका, असे आयोजकांना सांगावे लागले. तरीही लोकांनी या सूचनांकडे दुर्लक्ष करीत चटई पळवल्या.
आज जगभरात आंतरराष्ट्रीय योग दिवस साजरा केला जात आहे. मोदी सरकारच्यावतीने देशातील कानाकोपऱ्यात मोठा उत्सव साजरा केला जात आहे. पंतप्रधान नरेंद्र मोदी यांनी आज झारखंडमधील रांचीत योगा केला. तर केंद्रीय गृहमंत्री अमित शाह यांनी हजारो लोकांच्या उपस्थितीत हरियाणाच्या रोहतकमध्ये योग दिवस साजरा केला. अमित शाह यांच्यासोबत हरियाणाचे मुख्यमंत्री मनोहरलाल खट्टर हेही उपस्थित होते. हरियाणात केंद्रीय गृहमंत्री अमित शाह येणार असल्याने या ठिकाणी कार्यक्रमाची जोरदार तयारी करण्यात आली होती. लोकांसाठी हजारो चटई अंथरल्या होत्या. योगाचा कार्यक्रम संपताच लोकांची चटई गोळा करण्यासाठी पळापळ सुरू झाली. प्रत्येक जण चटई घेऊन पळून जात होता. कार्यक्रमासाठी अंथरलेली चटई घेऊन जाऊ नका असे आयोजकांकडून सांगण्यात आल्याने लोकांनी वाद घालायला सुरुवात केली. काहींनी चटई घेऊन कार्यक्रमस्थळांहून काढता पाय घेतला.
दरवर्षी २१ जून रोजी जगभरात योग दिवस साजरा केला जातो. गेल्या चार वर्षात दिल्ली, चंदीगड, लखनऊ, देहरादून या चार ठिकाणी पंतप्रधान नरेंद्र मोदी यांनी योग दिवस साजरा केला आहे. आज रांचीत पंतप्रधानांनी योग दिवस साजरा केला आहे.