मध्य रेल्वे मार्गावर सलग चार दिवस लोकल उशिराने धावल्याने प्रवाशांना मनस्ताप सहन करावा लागला असतानाच आज ट्रान्स हार्बरवर पनवेलच्या मार्गावर तांत्रिक बिघाड झाल्याने लोकल सेवा विस्कळीत झाली आहे.
आज सकाळी दहाच्या सुमारास पनवेलच्या मार्गावर तांत्रिक बिघाड झाल्याने ट्रान्स हार्बर मार्गावरील वाहतूक विस्कळीत झाली आहे. सकाळच्या वेळी लोकल विस्कळीत झाल्याने पनवेलच्या दिशेने जाणाऱ्या प्रवाशांना नाहक त्रास सहन करावा लागत आहे. चार दिवसांपूर्वी कल्याण-ठाकुर्ली स्थानकादरम्यान सिग्नल यंत्रणेत बिघाड झाल्याने मध्य रेल्वेची वाहतूक पुरती कोलमडली होती. या मार्गावरील लोकल तब्बल ४५ ते ५० मिनिटे उशिराने धावत होत्या. पहाटे सातच्या वेळी लोकल वाहतूक विस्कळीत झाल्याने कार्यालयात निघालेल्या नोकरदारांची मोठी कोंडी झाली होती. तर दोन दिवसांपूर्वी नेरळजवळ दुरंतो एक्स्प्रेसच्या इंजिनमध्ये बिघाड झाल्याने लोकलची वाहतूक विस्कळीत झाली होती.