यंदा मान्सूनचे आगमन लांबल्याने महाराष्ट्रासह देशभरात दुष्काळाचे चटके जाणवत आहेत. अजूनही मान्सून रेषा दक्षिण कर्नाटकमध्ये रेंगाळलेली आहे. मात्र येत्या दोन ते तीन दिवसांत गोवा आणि दक्षिण कोकणातील काही भागामध्ये मान्सून पोहोचेल, असा अंदाज हवामान विभागाने वर्तवला आहे. मात्र मान्सून राज्यात दाखल झाल्यानंतरही नंतर सातत्यपूर्ण पाऊस पडेल याबद्दल सध्या खात्री देता येत नाही.
राज्यामध्ये २१ जून रोजी मान्सून दाखल होईल आणि त्यानंतर २५ जूनपर्यंत तो राज्यात सर्वदूर पोहोचेल. त्यामुळे राज्यातील पुढची स्थिती वर्तवण्यासाठी २५ जूनपर्यंत प्रतीक्षा करावी लागेल, असे पुणे हवामान विभागाचे वरिष्ठ संशोधक डॉ. डी. एस. पै यांनी स्पष्ट केले. हवामान विभागाने बुधवारी वर्तवलेल्या अंदाजानुसार उत्तर आणि दक्षिण कोकणामध्ये सर्वदूर पावसाची शक्यता आहे. रायगड, रत्नागिरी, सिंधुदुर्गमध्ये एक-दोन ठिकाणी मुसळधार पावसाचा अंदाज वर्तवण्यात आला आहे. तर बुधवारी वर्तवलेल्या अंदाजानुसार मुंबई, ठाणे, पालघर येथे रविवारपर्यंत हलक्या ते मध्यम सरींचाच अंदाज आहे. मात्र २१ जूनला राज्यात मान्सून दाखल झाल्यानंतरही दक्षिण कोकणात एक-दोन ठिकाणीच मुसळधार सरींचा अंदाज असल्याने पावसाच्या पुढील प्रवासाबद्दल प्रश्नचिन्ह निर्माण झाले आहे.
मॉडेलवरून येत्या दोन आठवड्यांतील परिस्थितीचा अंदाज घेता २१ ते २७ जून या कालावधीत किनारपट्टीवर पावसाचा जोर वाढू शकतो. मात्र उर्वरित महाराष्ट्रात पावसाचा जोर फारसा नसेल अशी शक्यता आहे. या पार्श्वभूमीवर पाण्याचा वापर जपूनच व्हायला हवा, अशी अपेक्षा व्यक्त करण्यात येत आहे. यासंदर्भात जूनच्या शेवटच्या आठवड्यासंदर्भातील कल्पना आज, गुरुवारी येईल. तरी हवामानतज्ज्ञांमध्ये होणाऱ्या चर्चेनुसार मान्सूनच्या प्रगतीसाठी हवामानाची स्थिती सध्या आदर्श नाही. वायू चक्रीवादळामुळे अरबी समुद्रावर जमा झालेले बाष्प निघून गेले आहे. तसेच मान्सूनच्या वाऱ्यांची उंची समुद्रसपाटीपासून दीड ते दोन किलोमीटरपर्यंतच आहे. ही उंची सहा किलोमीटरवर असणे अपेक्षित असते. या वाऱ्यांच्या वर अपेक्षित असणारा पूर्वेकडून येणारा वाऱ्यांचा प्रवाहही नाही. त्यामुळे मान्सूला पूरक स्थिती निर्माण होताना दिसत नाही. बंगालच्या उपसागारावर कमी दाबाचा पट्टा जरी निर्माण झाला तरी बाष्पाचा अभाव असल्याने पावसाचा जोर किती काळ टिकेल याबद्दल शंका निर्माण होत आहेत.