जिल्ह्याचे पालकमंत्री गिरीश महाजनयांच्या जळगावातील संपर्क कार्यालयाजवळ बॉम्ब ठेवला असल्याचे तीन फोन सोमवारी (दि. १७) सायंकाळी ७ वाजता पोलिसांना आले. त्यानुसार तातडीने पोलिस पथकांनी श्वान पथकासह कार्यालयाजवळील परिसर पिंजून काढला. मात्र, बॉम्ब किंवा अन्य संशयित वस्तू आढळून आली नाही.
मंत्री गिरीश महाजन यांच्या शहरातील संपर्क कार्यालयाजवळ बॉम्ब ठेवल्याचा फोन आल्याने खळबळ उडाली. सायंकाळी ७ वाजता पोलिस नियंत्रण कक्ष, जिल्हापेठ पोलिस ठाणे व स्थानिक गुन्हे शाखा अशा तिन्ही ठिकाणी हे फोन आले. ‘महाजन यांच्या कार्यालयाजवळ टपरीत बॉम्ब ठेवले आहेत’, असा निरोप अनोळखी व्यक्तीने फोनवरून दिला होता. या फोननंतर पोलिस यंत्रणेचे बॉम्ब शोधपथक, श्वानपथक घटनास्थळी दाखल झाले होते. महाजन यांच्या कार्यालयाशेजारी असलेल्या एका टपरीची संपूर्ण तपासणी करण्यात आली. विद्यानिकेतन शाळेच्या बाहेर चहाचा स्टॉल लावणाऱ्या व्यक्तीची ही टपरी आहे. या टपरीतील सर्व सामानाची बॉम्ब शोधक पथकाने तपासणी केली. यानंतर महाजन यांच्या कार्यालयाच्या आत व बाहेरही तपासले. मात्र, या तपासणीत कोणत्याही प्रकारचा बॉम्ब किंवा संशयित वस्तू सापडली नाही.