मराठी मनोरंजनसृष्टीचा सुपरस्टार भरत जाधवचं नाटकावर असलेलं प्रेम सर्वांनाच माहीत आहे. भरतची एकाच वेळी तीन नाटकं सध्या रंगभूमीवर सुरू असून, तो प्रेक्षकांचं जोरदार मनोरंजन करतोय. रंगभूमीवरील मैलाचा दगड असलेलं ‘मोरुची मावशी’ हे नाटक पुन्हा आलं असून, त्यातल्या मावशीच्या भूमिकेतून भरत पुन्हा धमाल उडवण्यास सज्ज झाला आहे.
दिवंगत ज्येष्ठ अभिनेते विजय चव्हाण यांनी गाजवलेलं हे नाटक भरत त्याच ताकदीनं रंगवतोय. नाटकातलं ‘टांग टिंग टिंगा’ हे गाणं आणि त्यावर केलेला नाच हा नाटकाचा महत्त्वाचा भाग होता. या नाचासाठी विजय चव्हाण यांना तुफान वन्समोअर मिळायचा आणि विजय चव्हाणही त्याच उत्साहानं पुन्हा पिंगा घालण्यासाठी सज्ज व्हायचे. नाटकाच्या आगामी प्रयोगातून विजय चव्हाण यांना आदरांजली वाहण्यात येणार आहे.
भरतच्या ‘वन्समोअर’, ‘पुन्हा सही रे सही’ नाटकांचे प्रयोग सुरू असून त्यात आता ‘मोरुची मावशी’चीही भर पडली आहे. यावेळी नाटकांचं दिग्दर्शन प्रशांत विचारे यानं केलं असून जयराज नायर, प्रदीप वेंगुर्लेकर, उमेश बने, विनम्र भाबळ, गौरी फणसे, गौरी जोगळेकर, अंजली मायदेव आणि रुही तारू या कलाकारांच्या यात भूमिका आहेत.