राज्यपालांचे वास्तव्य असलेल्या राजभवनाची सुरक्षा अत्यंत कडक असते. राजभवनात परवानगीशिवाय कुणालाही जाणे शक्य नसते. परंतु, कर्नाटकच्या राजभवनात काही मांजरांनी घुसखोरी केली आहे. त्याचा त्रास राज्यपालांना होत आहे. राजभवनातून मांजरांना हटवण्यासाठी बेंगळुरू महापालिकेने एका खासगी कंपनीला १ लाख रुपयांचे कंत्राट दिल्याची माहिती समोर आली आहे.
याआधी डिसेंबर महिन्यात राजभवनमधून मांजरांना हटवण्यासाठी पालिका अधिकाऱ्यांना आदेश देण्यात आले होते. या अधिकाऱ्यांनी मांजरांना हटवण्याचा खूप प्रयत्न केला. परंतु, राजभवनातील मांजरं काही दिवस बेपत्ता होती. ती पुन्हा एकदा आली आहेत. आता पुन्हा एकदा या मांजरांनी आपले वास्तव्य राजभवनात केल्याने राज्यपालांना याचा त्रास होत आहे. कर्नाटकच्या राजभवनात एकूण ३० मांजरे आहेत. ही मांजरे हटवण्यासाठी तीन महिन्यांनंतर महापालिकेने एका खासगी कंपनीला याचे कंत्राट दिले आहे. महापालिकेच्या पशूसंवर्धन विभागाला कुत्रे आणि डुकर पकडण्याचा अधिकार आहे. मांजरी पकडण्याचा अनुभव नसल्याने पालिकेने खासगी कंपनीला टेंडर मागवून हे कंत्राट दिल्याची माहिती महापालिकेच्या एका अधिकाऱ्याने दिली आहे.
राजभवनमधील मांजरांना हटवण्यासाठी ९८ हजारांचे कंत्राट खासगी कंपनीला दिले आहे. जर ही किंमत जास्त वाटत असेल तर आम्ही हे कंत्राट रद्द करून पुन्हा टेंडर मागवू, असे महापालिकेचे आयुक्त एन. मंजुनाथ प्रसाद यांनी सांगितले. राज्यपाल यांच्या कुटुंबातील व्यक्ती आपल्या लाडक्या कुत्र्याला घेऊन फिरायला निघाल्यानंतर ही मांजरी समोर येतात. या मांजरांना पाहून कुत्रे त्यांच्यामागे धावतात. अशा वेळी कुत्र्यांना सांभाळणे कठिण होऊन बसते. या सर्व प्रकाराला कंटाळून राज्यपालांनी पालिकेकडे तक्रार केली होती, अशी माहिती सूत्रांनी दिली.