तीन वर्षांपासून प्रेमात राहिल्यानंतर जेव्हा लग्नाची वेळ आली तेव्हा प्रियकराने दुसऱ्या मुलीबरोबर लग्न करण्याचा निर्णय घेतला. प्रियकराने लग्नासाठी दिलेला नकार तरुणीला सहन न झाल्याने तिने प्रियकराच्या घरातच गळफास घेऊन आत्महत्या केल्याची धक्कादायक घटना उघडकीस आली आहे. आत्महत्या केलेली तरुणी एका नामांकीत सॉफ्टवेअर कंपनीमध्ये संगणक अभियंता म्हणून काम करीत होती. तर, तिचा प्रियकर खराडी येथील एका कंपनीत संगणक अभियंता म्हणून काम करतो.
श्वेता अरुण बिश्वास (वय ३०, रा. दस्तूररोड, कॅम्प) असे मृत मुलीचे नाव आहे. सचिन काशीद (३०, रा. स्वप्नलोक सोसायटी, पापडेवस्ती, फुरसुंगी) असे प्रियकराचे नाव असून, त्यास अटक करण्यात आली आहे. तो मूळचा बार्शीचा असून, नोकरीनिमित्त पुण्यात स्थायिक झाला होता. या प्रकरणी तरुणीचा भाऊ राहुल अरुण बिश्वास (३०, रा. दस्तूररोड, कॅम्प) यांनी फिर्याद दिली आहे. फुरसुंगी येथील पापडे वस्तीतील स्वप्नलोक सोसायटीत आरोपीचे घर आहे. तेथेच तरुणीने आत्महत्या केली. याबाबत हडपसर पोलिस ठाण्यात तरुणीच्या मृत्यूस कारणीभूत असल्याचा गुन्हा दाखल करण्यात आला आहे.
हडपसर पोलिस ठाण्याचे सहायक पोलिस निरीक्षक किरण लोंढे यांनी दिलेल्या माहितीनुसार, श्वेता हिचे फुरसुंगी येथील सचिन काशीद याच्याशी प्रेमसंबंध होते. मृत तरुणी कॅम्पमध्ये राहण्यास होती. मात्र, सचिन आणि ती लग्न करणार आहे, या उद्देशाने ती सुट्टीच्या दिवशी आणि वीकेंडला एकत्र राहत होते. तीन वर्षे एकत्र राहिल्यानंतर श्वेताने सचिनला लग्नाबाबत विचारले असता, त्याने लग्नास नकार दिला. दुसऱ्या मुलीशी लग्न करण्याचा त्याचा विचार सुरू असल्याचे श्वेताच्या लक्षात आले. तीन वर्षांपासून सोबत राहिलेल्या प्रियकराने आपला विश्वासघात केला, ही गोष्ट तिला सहन झाली नाही. सचिन बुधवारी कामाला गेल्यानंतर सचिनच्या राहत्या घरातच तिने गळफास घेतला. सचिन कामावरून आल्यानंतर श्वेताने आत्महत्या केल्याचे उघडकीस आले. त्यानंतर पोलिसांनी घटनास्थळी धाव घेत पुढील कायदेशीर प्रक्रिया पूर्ण केली. या घटनेचा पुढील तपास लोंढे करीत आहेत.
दोन दिवस आधी फोनवर आईला सांगितला होता सर्व प्रकार
सचिन काही दिवसांपूर्वी बार्शीला त्याच्या गावी गेला होता. त्या वेळी सचिनच्या लग्नासाठी एक मुलगी पाहण्यात आली होती. सचिनला ती मुलगी आवडल्याने त्याने तिच्यासमवेत लग्न करण्याचा निर्णय घेतला होता. त्यावरून श्वेता आणि सचिनमध्ये वाद झाला होता. या सर्व प्रकारामुळे श्वेता नैराश्येत गेली होती. दरम्यान, मंगळवारी सकाळी श्वेताने तिच्या आईला फोन करून सर्व प्रकार सांगितला होता. त्यानंतर तिने कुटुंबीयांचा फोन उचलला नव्हता, अशी माहिती तपास अधिकाऱ्यांनी दिली.