छत्रपती शिवाजी महाराजांच्या भूमिकेमुळे गाजलेले अभिनेते आणि शिवसेने उपनेते डॉ. अमोल कोल्हे शिवसेनेचं ‘शिवबंधन’ सोडून, राष्ट्रवादीचं घड्याळ हातावर बांधण्याची चिन्हे आहेत. आगामी लोकसभा निवडणुकीच्या पार्श्वभूमीवर कोल्हे राष्ट्रवादी काँग्रेसमध्ये प्रवेश करणार असल्याचं समजतं.
२०१४ मध्ये कोल्हे यांना छत्रपती शिवाजी महाराजांच्या भूमिकेमुळे मिळालेल्या लोकप्रियतेचा फायदा घेत शिवसेनेने त्यांच्या हाती शिवबंधन बांधलं होतं. त्यांना उपनेतेपदही दिलं. मात्र कोल्हे यांनी काही दिवसांपूर्वी राष्ट्रवादीचे अध्यक्ष शरद पावर यांची भेट घेतली आणि तर्कवितर्कांना उधाण आलं. कोल्हे हे राष्ट्रवादीच्या तिकिटावर शिरुर मतदारसंघातून निवडणूक लढवणार अशी शक्यता वर्तवली जात आहे. तसं झाल्यास तेथील शिवसेनेचे विद्यमान खासदार अढळराव पाटील यांना जोरदार टक्कर मिळू शकते.
अमोल कोल्हे यांची ‘स्वराज्यरक्षक संभाजी’ मालिकेतील संभाजीची भूमिकाही खूप गाजते आहे.