कर्नाटकातील एका वैद्यकीय महाविद्यालयात एमबीबीएसला प्रवेश मिळवून देण्याच्या आमिषाने दोघांची २१ लाख ६४ हजार रुपयांची फसवणूक केल्याचा प्रकार समोर आला आहे. या प्रकरणी विमानतळ पोलिस ठाण्यात फसवणुकीचा गुन्हा दाखल करण्यात आला आहे.
सातारा रोड परिसरात राहणाऱ्या एका ४२ वर्षीय महिलेने या प्रकरणी तक्रार दिली आहे. त्यानुसार निखिल कमलकिशोर अरोरा, अलोक रंजन, विनोदकुमार गुप्ता आणि अमित बन्सल या नावाच्या व्यक्तींविरोधात गुन्हा दाखल करण्यात आला आहे. पोलिसांनी दिलेल्या माहितीनुसार, तक्ररादार यांच्या मुलाने एमबीबीएसला प्रवेश मिळावा यासाठी नोंदणी केली होती. त्यावरून त्यांचा क्रमांक घेऊन आरोपीने तक्रारदार यांना फोन केला. कर्नाटकातील बीजीएस ग्लोबल मेडिकल कॉलेज या संस्थेत एमबीबीएसला प्रवेश मिळवून देतो, असे सांगितले. त्यानुसार त्यांना मे महिन्यात विमाननगर येथील त्यांच्या कार्यालायत बोलवून घेतले. त्या ठिकाणी प्रवेशाबाबत चर्चा झाली. त्यानंतर आपोपीने त्यांना बेंगळुरू येथे नेऊन त्या ठिकाणी काही जणांची भेट घालून दिली. त्यानंतर ई-मेलद्वारे त्यांच्याशी संवाद साधला. आरोपीने २० लाख रुपये दिल्यानंतर प्रवेश देतो, असे सांगितले. त्यांचा विश्वास संपादन करून आरोपीने प्रवेशासाठी त्यांच्याकडून २० लाख १४ हजार रुपये घेतले. तसेच, तक्रारदार यांच्या ओळखीच्या आणखी एकाला एमबीबीएसला प्रवेश हवा होता. त्यासाठी सुरुवातील त्याच्याकडून एक लाख ५० हजार रुपये घेतले. अशा प्रकारे दोघांकडून आरोपीने २१ लाख ६४ हजार रुपये घेतले. पण, त्या दोघांनाही एमबीबीएसला प्रवेश दिला नाही. फसवणूक झाल्याचे लक्षात आल्यानंतर त्यांनी पोलिसांकडे तक्रार दिली. त्यानुसार सहायक निरीक्षक एम. आर. खोकले अधिक तपास करत आहेत.