कॉसमॉस बँकेच्या सर्व्हरमधून डेबिट कार्डधारकांची माहिती चोरून त्याद्वारे बँकेवर ९४ कोटी रु.चा सायबर दरोडा घालण्याचा प्रकार उघडकीस आला असतानाच, कार्डांचे क्लोनिंग करून ६४ जणांची लाखो रुपयांना फसवणूक केल्याची घटना समोर आली आहे. हॉटेल व ढाब्यांवरील कर्मचाऱ्याकडूनच ही लूट झाली आहे.
मुलुंडमधील एका तरुणाच्या डेबिट कार्डाद्वारे कर्नाटकातून २४ हजार रु. काढण्यात आले. त्याचे कार्ड असलेल्या बँकेच्या अधिकाऱ्यांकडे पोलिसांनी चौकशी केली, त्यावेळी एचडीएफसी बँकेच्या ६४ ग्राहकांनीही अशा प्रकारच्या तक्रारी केल्याचे अधिकाऱ्यांनी सांगितले. यातील बहुतांश लोकांनी मुंबईतील सुनील हॉटेल प्रायव्हेट लिमिटेड, अपना ढाबा, अर्बन तडका, रेन फॉरेस्ट या हॉटेलांमध्ये बिल भरण्यासाठी कार्डचा वापर केल्याचे निदर्शनास आले. या हॉटेलांमध्ये काही दिवस काम करणारा एक कर्मचारी छत्तीसगडमध्ये असल्याचे समजल्यानंतर तेथून धनेश उर्फ करण टंडन याला तसेच कर्नाटकातून इतरांना अटक केली.
आठ मोबाइल, १ लाख ९० हजार रु.ची रोख रक्कम, विविध बँक खात्यात ५ लाख ७३ हजार रु., तीन स्किमर मशिन, विविध बँकांचे पासबुक, पिनकोड नंबर लिहिलेली वही, १ लाख रु. किमतीची होंडा होर्नट मोटारसायकल.
‘कॉसमॉस’च्या यंत्रणेतूनच लूट
देशातील ऑनलाइन आर्थिक व्यवहारांवर नियंत्रण ठेवणाऱ्या नॅशनल पेमेंट्स कॉर्पोरेशन ऑफ इंडिया (एनपीसीआय) या प्राधिकरणाने आपली प्रणाली पूर्ण सुरक्षित असल्याचा निर्वाळा दिला आहे. कॉसमॉस बँकेच्या सिस्टीमवर सायबर हल्ला झाल्यानेच ९४ कोटींची लूट झाली. ‘एनपीसीआय’ची यंत्रणा भेदून कोणतीही लूट झालेली नाही’, असे प्राधिकरणाने स्पष्ट केले आहे. तसेच ‘या ऑनलाइन घोटाळ्याचे कारण शोधून काढण्यासाठी कॉसमॉस बँकेला सर्वतोपरी सहाय्य करण्यात येईल’, असे प्राधिकरणाने म्हटले आहे.