हरयाणातील सोनीपत जिल्ह्यात व्हाट्सअॅप ग्रुपचा ‘डीपी’ बदलला म्हणून एका युवकाची हत्या करण्यात आली आहे. युवकानं व्हॉट्सअॅप ग्रुपचा प्रोफाइल फोटो म्हणजेच डीपी बदला, परंतु ग्रुपमधील इतर सदस्यांना बदलेला प्रोफाइल फोटो आवडला नाही, त्यामुळं ग्रुपमधील सदस्यंनी त्या युवकाची हत्या केली. या प्रकरणात एकाच कुटुंबातील आठ जणांवर गुन्हा दाखल करण्यात आला आहे.
जौहर कुटुंबातील सदस्यांच्या व्हाट्सअॅप ग्रुपवर रविवारी रात्री काही वाद सुरू होता. हा वाद सुरू असतानाच ग्रुपच्या अॅडमीन पैकी एक लव जौहर यानं ग्रुपचा प्रोफाइल फोटो बदलला. यावर इतर सदस्यांनी आक्षेप घेतला. त्यानंतर त्याला ग्रुपमधून बाहेर काढण्यात आलं आणि पुन्हा ग्रुपचा प्रोफाइल फोटो बदलण्यात आला. आणि पुन्हा त्याला ग्रुपमध्ये अॅड करण्यात आलं, अशी माहिती लव जौहरचा भाऊ अजय जौहर यानं दिली आहे.
त्यानंतर ग्रुपमधील इतर सदस्यांनी लव जौहर याला बाहेर भेटण्यासाठी बोलवलं आणि त्याला मारहाण केली. त्याला वाचवण्यासाठी पुढं आलेल्या काही जणांनाही बेदम मारहाण करण्यात आली. या घटनेत गंभीर दुखापत झाल्यानं लव जौहरचा जागीच मृत्यू झाला. शवविच्छेदन केल्यानंतर लव जौहराचा मृतदेह त्याच्या कुटुंबीयांकडं सोपवण्यात आला असून या प्रकरणी आठ जणांवर गुन्हा दाखल करण्यात आल्याचं पोलिसांनी सांगितलं.