गुन्हे शाखा पोलिसांनी १७ वर्षीय दोन अल्पवयीन मुलांना ताब्यात घेऊन तब्बल ११० मोबाइल जप्त केले. त्यांच्याकडून पाच चोरीच्या घटना उघडकीस आणण्यात पोलिसांना यश आले.
काही दिवसांपूर्वी सक्करदऱ्यातील सुगंध शॉपी येथे चोरी झाली. यानंतर शहरातील काही दुकानांमध्ये घरफोड्या झाल्या. घरफोड्यांचा छडा लावण्याचे आदेश गुन्हे शाखेचे उपायुक्त संभाजी कदम यांनी दिले. सहायक निरीक्षक किरण चौगले, प्रदीप अतुलकर, उपनिरीक्षक मनीष वाकोडे, राजपूत, हेडकॉन्स्टेबल बट्टुलाल पांडे, रमेश उमाठे, मिलिंद मून, नृसिंह दमाहे, सतीश मेश्राम, सुधाकर धंदर, प्रशांत, सतीश, रवींद्र राऊत, अविनाश ठाकूर, ज्ञानेश्वर तांदूळकर, दीपक झाडे, राजेंद्र तिवारी यांनी घरफोड्याचा शोध सुरू केला. पोलिसांनी गुप्त माहितीच्या आधारे दोघांना ताब्यात घेतले, त्यांच्याकडून ११० मोबाइल, रोख व दागिने असा एकूण तीन लाखांचा ऐवज जप्त केला. ताब्यातील मुलांनी मौदा, भंडारा व छिंदवाड्यातील पाच मोबाइल शॉपी फोडून मोबाइल चोरी केल्याचेही तपासादरम्यान समोर आले आहे.