नातेवाइक तरुणीला प्रेमाच्या जाळ्यात अडकवून तिच्याशी लग्न ठरविले. तिच्यावर अत्याचार केला. ३ जूनला लग्नाच्या दिवशीच नवरदेव बेपत्ता झाला. ही घटना सक्करदरा भागात उघडकीस आली. याप्रकरणी पोलिसांनी तरुण व त्याच्या नातेवाइकांविरुद्ध अत्याचार व फसवणुकीचा गुन्हा दाखल केला आहे.
प्रवीण शिवचरण शामकुंवर, त्याची आई सुशीलाबाई शिवचरण शामकुंवर, प्रणिता नितीन साळवे, अनिता सचिन बहादुरे व अनिता सौमित्र मेश्राम सर्व रा. भांडे प्लॉट, सेवादलनगर, अशी गुन्हा दाखल करण्यात आलेल्यांची नावे आहेत. प्रवीण हा एका औषध कंपनीत एमआर आहे. पोलिसांनी दिलेल्या माहितीनुसार, पीडित मुलगी खासगी कंपनीत नोकरी करते. प्रवीण हा तिचा नातेवाइक आहे. दोघांची ओळख होती. २०१२मध्ये त्याने तिला प्रेमाच्या जाळ्यात अडकविले. तिच्यावर अत्याचार केला. दोघांच्या प्रेमसंबंधाबात त्यांच्या नातेवाइकांना कळले. त्यांनी दोघांचे लग्न ठरविले. ३ जूनला लग्न होते. लग्नघटिका जवळ आल्यानंतरही प्रवीण व त्याचे नातेवाइक मंगल कार्यालयात पोहोचले नाहीत. तरुणीच्या नातेवाइकांनी प्रवीण व त्याच्या आईशी मोबाइलवर संपर्क साधला. दोघांनी त्यांना तीन लाख रुपये हुंड्याची मागणी केली. याबाबत कळताच तरुणीने सक्करदरा पोलिस स्टेशन गाठून तक्रार दिली. पोलिसांनी अत्याचार व फसवणुकीचा गुन्हा दाखल केला.