हॅलो मी मोरे बोलतोय, तुम्हाला मी ओळखत असून आपण नातेवाइकांच्या लग्नात भेटलो होतो, असे म्हणून पुणे येथील अल्हाट कुटुंबाला तालुक्यातील नान्नज परिसरात बोलवून तीन चार जणांनी दमबाजी करीत मोबाइलसह अंगावरील ३४ हजार रुपयांचे दागिने लुटून नेले. याप्रकरणी अज्ञातांविरोधात जामखेड पोलिस स्टेशनला गुन्हा दाखल करण्यात आला आहे. दोन महिन्यातील सोने लुटीची ही तालुक्यातील दुसरी घटना आहे.
पोलिसांकडून मिळालेली माहिती अशी, फिर्यादी विशाल नामदेव अल्हाट (वय २५, रा. आंबेडकर नगर, १६ मार्केट यार्ड, पुणे) यांना सात ते आठ दिवसांपूर्वी त्यांच्या मोबाइलवर फोन आला व ‘मी जामखेडमधून मोरे बोलत आहे. तुम्हाला मुलगी बघितली आहे. तरी मुलगी पहाण्यासाठी नान्नज येथे या. त्यानंतर वेळोवेळी फोन येत होते. मुलाच्या आईने एकदा फोनवरील व्यक्तीला आम्ही तुम्हाला ओळखत नसल्याचे सांगितल्यानंतरही त्या व्यक्तीने मी तुम्हाला ओळखतो. आपण नातेवाइकांच्या लग्नात भेटलो होतो, असे सांगून विश्वास संपादन केला व त्यांना मुलगी पहाण्यासाठी तयार केले. यानंतर १ जून रोजी सकाळी फिर्यादी विशाल, त्याची आई, बहीण, आजी, चुलती, शेजारी असे भाड्याने रिक्षा घेऊन पुण्याहून जामखेडला निघाले. संबंधित व्यक्ती नान्नज रोडवरच उभी होती. त्यानंतर या रिक्षासह या कुटुंबाला निर्जन ठिकाणी नेले. त्याच दरम्यान शेतात लपलेल्या दोन ते तीन जणांनी त्यांना अडवून महिलांच्या अंगावरील दागिने व मोबाइल असा एकूण ३४ हजार रुपयांचा ऐवज चोरून नेला.