विमान प्रवासास विलंब होणे, उड्डाण उशिराने होणे किंवा लँडिंगनंतरही पार्किंगसाठी जागा न मिळाल्याने प्रवाशांना विमानात बसून राहण्याची वेळ येणे, हे प्रकार सातत्याने घडतच असतात. मात्र, गुरुवारी दुपारी नवी दिल्लीहून निघालेले विमान पुण्याऐवजी थेट हैदराबादला पोहोचल्याची घटना घडली. विमानामध्ये पुरेसे इंधन नसल्याच्या कारणामुळे इंधन भरण्यासाठी विमान हैदराबाद जाणार असल्याची घोषणा विमानात करण्यात आल्याचा दावा प्रवासी करत आहेत, तर ट्रॅफिक कन्जेशनमुळे विमान हैदराबादला नेण्यात आल्याचे कंपनी प्रशासनाचे म्हणणे आहे.
जेट एअरवेजचे नवी दिल्ली-पुणे (९डब्ल्यू-७९५) या विमानाने नवी दिल्ली येथून दुपारी सव्वा वाजता उड्डाण केले. हे विमान दुपारी तीन वाजून २५ मिनिटांनी लोहगाव विमानतळावर दाखल होणे अपेक्षित होते. मात्र, हे विमान हैदराबाद मार्गे पुण्याला आणण्यात आल्याने नियोजित वेळेपेक्षा ५३ मिनिटे उशिराने, म्हणजेच चार वाजून १८ मिनिटांनी लोहगाव विमानतळावर लँड झाले. याबाबत एका प्रवाशाने सोशल मीडियावर पोस्ट करून संताप व्यक्त केला. विमानात इंधन कमी असल्यामुळे हे विमान पुण्याऐवजी हैदराबादला नेण्यात आले, असे प्रवाशाने म्हटले आहे. हैदराबादला इंधन भरून विमान पुण्याला नेण्यात येईल, अशी घोषणा विमानात आली. विमानात पुरेसे इंधन नसणे ही गंभीर बाब आहे. हा प्रकार म्हणजे प्रवाशांच्या जीवाशी खेळ असल्याची टीका संबंधित प्रवाशाने केली आहे.
पुणे-अहमदाबाद (एसजी-५२४) हे स्पाइस जेट कंपनीचे विमानाचे उड्डाण रात्री नऊ वाजता होणे अपेक्षित होते. त्या ऐवजी या विमानाला दोन तास १५ मिनिटे उशिर होणार होता. एअर इंडियाचे पुणे-दिल्ली (एआय-८५४) विमान एक तास पाच मिनिटे उशिराने उडणार होते. त्याची नियोजित वेळ रात्री नऊ वाजून ५५ मिनिटे होती. पुणे-बेंगळुरूचे गो-एअरचे (जी८-२८४) विमानदेखील एक तास पाच मिनिटे विलंबाने टेक ऑफ करणार होते. त्याची नियोजित वेळ रात्री १० वाजून २५ मिनिटे होती.
पुणे विमानतळ येथे ट्रॅफिक कन्जेक्शन असल्यामुळे विमानाचा मार्ग लोहगाव विमानतळाऐवजी हैदराबादला वळविण्यात आला.