एकीकडे महापौरांनीच मेट्रोकामामुळे मुंबई तुंबण्याची शक्यता व्यक्त केली असताना, दुसरीकडे मुंबईतील नालेसफाईची कामे अपुरी असल्याच्या मुद्द्यावरून नगरसेवकांनी प्रशासनाला धारवर धरले. या पार्श्वभूमीवर हिंदमाता येथे यंदाही पाणी तुंबणार असल्याचे स्पष्ट झाले आहे.
हिंदमाता येथील ड्रेनेज लाइन ब्रिटिशकालीन आहे. त्यामध्ये झाडे आणि झाडांची मुळे मोठ्या प्रमाणावर गेल्याने फक्त दहा टक्के पाणी या लाइनवरून जाते. इतर पाण्याचा निचरा होणारा ९० टक्के भाग बंद झाला आहे. त्यामुळे ही ड्रेनेजलाइन बदलण्याचे काम फेब्रुवारीपासून सुरू आहे. हे काम लांबले असले, तरी लवकरच पूर्ण होईल. मात्र अतिवृष्टी व भरती एकाचवेळी असेल, तर यावेळीही पाणी तुंबण्याची शक्यता असल्याचे पर्जन्य जलवाहिन्या विभागाचे मुख्य अभियंता विद्याधर खणकर यांनी सांगितले.