कोंढवा पोलिस ठाण्यात दाखल असलेल्या बलात्काराच्या गुन्ह्यातील आरोपीला उपचारांसाठी ससून रुग्णालयात आणल्यानंतर तो पसार झाल्याची घटना रविवारी सकाळी घडली. या आरोपीसाठी चार पोलिस तैनात असताना देखील हा आरोपी बेड्या काढून पळून गेल्यामुळे खळबळ उडाली आहे. या प्रकरणी बंडगार्डन पोलिस ठाण्यात गुन्हा दाखल करण्यात आला आहे.
अक्षय अशोक लोणारे (वय २१, रा. पोकळे मळा, कोंढवा बुद्रुक) असे पळून गेलेल्याचे नाव आहे. या प्रकरणी बंडगार्डन पोलिस ठाण्यात पोलिस नाईक सचिन निकम (रा. फुरसुंगी) यांनी तक्रार दिली आहे. पोलिसांनी दिलेल्या माहितीनुसार, अक्षय लोणारे याच्यावर कोंढवा पोलिस ठाण्यात २०१५मध्ये बलात्काराचा गुन्हा दाखल आहे. या गुन्ह्यात तो सध्या न्यायलयीन कोठडी होता. त्याची रवानगी येरवडा मध्यवर्ती कारागृहात करण्यात आली होती. अक्षयला मानसिक आजार झाल्याने १९ मे रोजी ससून रुग्णालयात उपचारांसाठी दाखल करण्यात आले होते. त्याच्यावर मनोरुग्णालयातील वॉर्ड क्रमांक २६मध्ये उपचार सुरू होते. त्याच्या हातात बेड्या होत्या.
अक्षय याच्या रखवालीची जबाबदारी शनिवारी सकाळी नऊ ते रविवारी सकाळी नऊ दरम्यान पोलिस मुख्यालयातील कोर्ट कंपनीत नेमणुकीस असणारे निकम यांच्यासह चौघांवर होती. रविवारी सकाळी सव्वाआठ वाजण्याच्या सुमारास पोलिस कर्मचारी निकम आणि खेंदाड चहा पिण्यासाठी रुग्णालयाच्या कँटीनमध्ये गेले. त्या वेळी कुंभार लंघुशंकेसाठी स्वच्छतागृहात गेले. त्या वेळी पांचाळ एकटेच त्या ठिकाणी होते. त्या वेळी आरोपी अक्षय हातातील बेड्या काढून पांचाळ यांची नजर चुकवून पसार झाला. पांचाळ यांच्या हा प्रकार लक्षात येताच त्यांनी सहकारी कर्मचाऱ्यांना माहिती दिली. चौघांनी ससून रुग्णालय व रेल्वे स्टेशन परिसरात त्याचा शोध घेतला. परंतु, अक्षय सापडला नाही. त्यानंतर त्यांनी बंडगार्डन पोलिसांना माहिती दिली. या प्रकरणी बंडगार्डन पोलिस तपास करीत आहेत.
स्वतंत्र वॉर्ड नाही
ससून रुग्णालयात उपचारांसाठी आणलेले आरोपी पळून गेल्याच्या अनेक घटना घडल्या आहेत. कामात हलगर्जीपणा केल्याचा ठपका ठेऊन अनेक पोलिसांना या प्रकरणांत निलंबित व्हावे लागले आहे. नयना पुजारी खून प्रकरणातील आरोपी योगेश राऊत हा देखील ससूनमधून पळाला होता. त्यानंतर ससूनमध्ये आरोपीसाठी स्वतंत्र वॉर्ड करण्याची योजना आखण्यात आली होती. मात्र, त्याचे पुढे काहीच झाले नाही. आरोपी व कैदी पळून जाण्याचे प्रकार घडत असताना पोलिस कर्मचाऱ्यांकडून दक्षता घेतली जात नसल्याचे समोर आले आहे.