पत्नीच्या चारित्र्यावर संशय घेऊन तिच्यावर पाळत ठेवण्यासाठी पतीने चक्क घरातील बेडरुममध्ये छुपा कॅमेरा बसवल्याचा धक्कादायक प्रकार पुण्यात उघडकीस आला आहे. या कॅमेऱ्याद्वारे तो तिच्यावर ‘नजर’ ठेवून होता. ही बाब लक्षात आल्यानंतर पत्नीने त्याच्याविरोधात तक्रार दाखल केली. पोलिसांनी त्याच्यावर गुन्हा नोंदवला आहे.
वानवडी पोलिसांच्या माहितीनुसार, पत्नीवर पाळत ठेवण्यासाठी पतीने २२ ते २६ जानेवारीदरम्यान बेडरुममध्ये छुपा कॅमेरा बसवला होता. हा कॅमेरा तिच्या हाती लागला होता. यात घरातील सर्व दृश्ये चित्रित झाली होती. त्यानंतर पीडितेने पतीविरोधात तक्रार दाखल केली. पोलिसांनी त्याच्याविरोधात गुन्हा दाखल केला आहे.
या दाम्पत्याला १२ वर्षांचा मुलगा आहे. विदेशातून परतल्यानंतर तो पत्नीच्या चारित्र्यावर संशय घेऊ लागला. यावरून त्यांच्यात भांडणे होऊ लागली. तिचा मानसिक आणि शारीरिक छळ करू लागला, अशी माहिती पोलिसांनी दिली. पोलीस उपनिरीक्षक रेखा काळे यांनी सांगितले, की ‘महिलेचा पती विदेशातून परतल्यानंतर तिच्यासोबत राहू लागला. आठ महिने ते एकत्र राहिले. पण त्यांच्यात वाद होऊ लागले. काही दिवसांनी तो त्याच्या बेंगळुरूतील घरी राहायला गेला. विकेंडला तो मुलाला भेटण्यासाठी पुण्यात यायचा. तो पत्नीवर संशय घ्यायचा. त्यामुळे तिच्यावर नजर ठेवण्यासाठी त्याने बेडरुममध्ये कॅमेरा बसवला. हा कॅमेरा एके दिवशी तिच्या हाती लागला.’ हा प्रकार पाहून संतापलेल्या पत्नीने संशयी पतीविरोधात पोलीस ठाण्यात तक्रार दाखल केली. त्याच्याविरोधात गुन्हा नोंदवला असून, घटनेचा तपास करण्यात येत आहे, अशी माहितीही पोलिसांनी दिली.