पत्नीच्या गर्भात मुलगी असल्याच्या संशयावरून पतीने पत्नीच्या गर्भावर लाथा-बुक्क्यांनी मारहाण केल्याचा धक्कादायक प्रकार समोर आला आहे. पहिली मुलगी असल्याने पत्नी दुसऱ्यांदा गर्भवती राहिल्यावर मुलगाच हवा, असे म्हणून पतीने हा प्रकार केला आहे. या प्रकाराने विवाहितेचा गर्भपात झाला आहे. पतीला अटक करण्यात आली आहे. हा प्रकार नुकताच उघडकीस आला. पोलिसात गुरुवारी गुन्हा दाखल करण्यात आला.
याबाबत पतीच्या सासऱ्यांनी वाकड पोलिस ठाण्यात फिर्याद दिली आहे. पतीच्या या कृत्याने पत्नीला मानसिक धक्का बसला आहे. त्यांच्यावर सध्या पिंपरीतील खासगी हॉस्पिटलमधील मनोरुग्ण विभागात उपचार सुरू आहेत. पोलिसांनी दिलेल्या माहितीनुसार, या दोघांचा विवाह चार वर्षांपूर्वी झाला होता. त्यानंतर काही वर्षांनी त्यांना मुलगी झाली होती. परंतु, त्या मुलीच्या पालन पोषणासाठी पती सासरच्या मंडळींकडे पैशांची मागणी करीत होता. तसेच, वेळोवेळी पत्नीचा मानसिक छळ करत होता. त्याची पत्नी दुसऱ्यांदा गर्भवती राहिली. तेव्हा तिला पुन्हा मुलगी होणार, या संशयावरून तो पत्नीला नेहमी मारहाण करीत असे. पत्नी साडेतीन महिन्यांची गर्भवती असताना दोघात मुलगी होणार, की मुलगा यावरून भांडण झाले आणि पतीने पत्नीच्या गर्भावर लाथा-बुक्क्यांनी जबर मारहाण केली. यातच पत्नीचा गर्भपात झाला. या घटनेचा पत्नीवर मोठा मानसिक आघात झाला. यामुळे ती मनोरुग्ण झाली. पती हा एका बँकेत कंत्राटी कामगार म्हणून काम करतो. वाकड पोलिसांनी त्याला अटक केली आहे. पौर्णिमेच्या दिवशी गर्भधारणा झाली म्हणजे मुलगीच होईल, या समजुतीने काही दिवसांपूर्वी वाकड परिसरातच एका विवाहितेच्या पोटावर लाथा-बुक्क्यांनी मारहाण करण्यात आली होती. यामध्ये त्या विवाहितेचा गर्भपात झाला होता. त्यानंतर आता ही दुसरी घटना उघड झाली आहे.