महाराष्ट्र नवनिर्माण सेनेचे अध्यक्ष राज ठाकरे सध्या कार्यकर्त्यांशी संवाद साधण्यासाठी राज्यव्यापी दौऱ्यावर आहेत. सोमवारपासून त्यांचा दौऱ्याचा दुसरा टप्पा सुरू होत असून कर्जत येथून दौऱ्याला सुरुवात होत आहे. जिल्ह्यातील स्थानिक प्रश्न समजून घेण्यासाठी आणि पक्ष कार्यकर्त्यांशी संवाद साधण्यासाठी जिल्ह्यातील प्रत्येक तालुक्यात त्यांचा संवाद कार्यक्रम असणार आहे.
१४ ते १७ मे या कालावधीत मनसे अध्यक्ष राज ठाकरे पक्षाच्या पदाधिकाऱ्यांशी संवाद साधणार आहेत. सोमवारी कर्जत तालुक्यापासून त्यांच्या दौऱ्याला सुरुवात होईल. कर्जत, खोपोली, अलिबाग, रोहा, श्रीवर्धन, महाड, पोलादपूर, माणगाव, पेण, पनवेल आणि उरण अशा ११ ठिकाणी त्यांच्या भेटीचा कार्यक्रम होणार आहे. पदाधिकाऱ्यांच्या अडचणी आणि स्थानिक प्रश्न जाणून घेण्याचा प्रयत्न राज ठाकरे करणार असल्याची माहिती रायगड जिल्हाध्यक्ष अतुल भगत यांनी पत्रकार परिषदेत सांगितले. विशेष म्हणजे राज ठाकरे पहिल्यांदाच स्थानिक प्रश्न थेट लोकांकडून जाणून घेण्यासाठी सामाजिक संस्थांशी संपर्क साधणार आहेत. पनवेलमध्ये १७ मे रोजी सकाळी ९ वाजता गार्डन हॉटेल येथे सामाजिक संस्थांच्या पदाधिकाऱ्यांशी थेट संवाद साधणार आहेत. यामध्ये पनवेल संघर्ष समिती, सामाजिक संस्थांची समन्वय समिती, सिटिझन्स युनिटी फोरम, जेष्ठ नागरिक संघ पनवेल यांच्यासह अन्य सामाजिक संस्थांच्या पदाधिकाऱ्यांचा समावेश असेल. त्यानंतर पनवेल शहरातील जेष्ठ नागरिक संघाच्या सभागृहात तालुक्यातील सर्व पदाधिकाऱ्यांशी संवाद साधतील.