भोसरीतील भुखंड खरेदी प्रकरणातून क्लीन चिट मिळाल्यानंतर भाजपचे ज्येष्ठ नेते, माजी महसूल मंत्री खडसे यांचं मंत्रिमंडळात पुनरागमन होण्याची शक्यता वर्तविली जात होती. मात्र खडसे यांनी या सर्व शक्यतांना पूर्णविराम दिला आहे. ‘मंत्रिमंडळात परतण्याची अजिबात इच्छा नाही,’ अशी उद्विग्न प्रतिक्रिया खडसे यांनी दिली आहे.
एका वृत्तसंस्थेशी बोलताना एकनाथ खडसे यांनी ही प्रतिक्रिया व्यक्त केली आहे. ‘मंत्रिमंडळात परतण्याची इच्छा नाही. पण भाजप सोडणार नाही,’ असं खडसे यांनी स्पष्ट केलं. ‘भाजप मला फॅमिलीसारखी आहे. भाजपमध्येच मी राजकीयदृष्ट्या लहानाचा मोठा झालो. त्यामुळे हा पक्ष माझं कुटुंब आहे. अडचणीच्या काळात भाजपनेच मला आधार दिला,’ असंही खडसेंनी स्पष्ट केलं. निवडणुकीला एक वर्ष राहिले आहे. मंत्रीपद मिळालं तरी काम करता येणार नाही. शिवाय पक्षाचं कामही करायचं आहे. त्यामुळे मंत्रिमंडळात प्रवेश करण्याची इच्छा राहिली नाही, असं ते म्हणाले.
गावितांना उमेदवारी का?
दरम्यान, पालघरमधून गावित यांना तिकीट देणं चुकीचं असल्याचं त्यांनी सांगितलं. श्रीनिवास वनगा यांना उमेदवारी देऊन शिवसेनेने चूक केली म्हणता मग गावितांना उमेदवारी कशी दिली? असा घरचा आहेरही खडसे यांनी भाजपला दिला.