गोरेगावमधील आरे दुग्ध वसाहतीतील राज्य राखीव पोलिस दलाच्या व्यायामशाळेत रविवारी सकाळी बिबट्या घुसल्याचे कळल्यानंतर काही काळ या परिसरात घबराटीचे वातावरण पसरले होते. अखेर एसआरपीएफच्या जवानांनी व्यायामशाळेला घेराव घातल्यानंतर आणि वनविभागाच्या बचाव पथकाने घटनास्थळी धाव घेऊन बिबट्याला बेशुद्ध करत ताब्यात घेतल्यानंतर सर्वांनी सुटकेचा निश्वास सोडला.
एसआरपीएफच्या व्यायामशाळेत बिबट्या घुसला असल्याचे सकाळी ८.३०च्या सुमारास काहींनी पाहिले. त्यामुळे वनविभागाच्या नियंत्रण कक्षाला तात्काळ कळवण्यात आले आणि त्याचवेळी व्यायामशाळेचे दरवाजेही बाहेरून बंद करण्यात आले. त्याचबरोबर एसआरपीएफच्या जवानांनी व्यायामशाळेला घेराव घालण्यासह परिसरातही बंदोबस्त ठेवला. तासाभरात वनविभागाचे बचाव पथक व्यायामशाळेच्या ठिकाणी दाखल झाल्यानंतर बिबट्याला बंदुकीच्या माध्यमातून इंजेक्शन देऊन बेशुद्ध करण्यात आले. अखेरीस या बिबट्याला ताब्यात घेत बोरिवलीतील संजय गांधी राष्ट्रीय उद्यानातील पशुवैद्यकीय रुग्णालयात नेण्यात आले. या बिबट्याची वैद्यकीय तपासणी करतानाच त्याच्या शरीरात मायक्रोचीपही टाकण्यात आली असल्याची माहिती उद्यान अधिकाऱ्यांनी दिली.