बिग बॉसच्या घरातील चौथा आठवडा टीका, शेरेबाजी किंवा वादावादी करत बराच गाजला. मागच्या आठवड्यात राजेश शृंगारपुरे घरातून बाहेर पडल्यानंतर आता कोणता सदस्य बेघर होणार याची प्रेक्षकांमध्ये उत्सुकता होती. जुई गडकरी, सुशांत शेलार, अनिल थत्ते आणि आस्ताद काळे या चार सदस्यांचं नॉमिनेशन झालं होतं. त्यामुळे या चौघांपैकी एक जण बेघर होणार हे नक्की होतं. जुई गडकरीला सुरक्षित घोषीत केल्यानंतर सुशांत शेलार, अनिल थत्ते आणि आस्ताद काळे हे तिघं ‘डेंजर झोन’मध्ये होते. अखेर अनिल थत्ते बिग बॉसच्या घरातून बाहेर पडल्याचं मांजरेकरांनी सांगितलं.
महेश मांजरेकरांनी बेघर झालेल्या सदस्याचं नाव घोषित करताच घरातील इतर सदस्य देखील भावूक झाले. पुष्करच्या डोळ्यातही पाणी आले. अन् विशेष म्हणजे आऊ म्हणजेच उषा नाडकर्णी देखील रडल्याचं पाहायला मिळालं.
विचित्र वेशभूषा असो किंवा खोचक बोलणे, अनिल थत्ते यांच्याकडे दुर्लक्ष करणे तसे कठीण होते. घरातील इतर सदस्यांचे आणि थत्तेंचे सतत खटके उडत असत. त्यांच्या फटकळ स्वभावामुळे त्यांना बऱ्याच जणांची बोलणी देखील खावी लागली. बिग बॉस’च्या घरातील सदस्यांशी पहिल्या दिवसापासून वाद घालताना दिसणाऱ्या अनिल थत्तेंची वेगळीच बाजू प्रेक्षकांसमोर आली होती.एरव्ही सर्वांवर तोंडसुख घेणारे अनिल थत्ते घरातील कॅमेऱ्यासमोर अचानक रडू लागल्यानं सर्वांना आश्चर्याचा धक्का बसला होता.