बॉलिवूडमधील तुषार कपूर, करण जोहर, आमीर खान अशा अनेक कलाकारांनी सरोगसीद्वारे अपत्यप्राप्तीचा पर्याय निवडला आहे. या कलाकारांच्या यादीत एका मराठमोळ्या अभिनेत्याचे नाव आता जोडलं गेलंय. अभिनेता श्रेयस तळपदेच्या घरी चिमुकलीचं आगमन झालंय.
श्रेयस आणि त्याची पत्नी दीप्ती यांच्या घरी ४ मे रोजी मुलीचा जन्म झाला. लग्नाच्या १४ वर्षांनंतर त्यांना अपत्यप्राप्ती झाली आहे. याबाबत सांगताना श्रेयस म्हणाला, ‘आम्हाला १० ते १२ मे दरम्यान बाळ होईल असं सांगण्यात आलं होतं. त्यामुळे मी आणि दिप्ती हाँग-काँगला गेलो. परंतु, मुंबईत येत्या काही तासात कधीही आमच्या बाळाचा जन्म देऊ शकते असा निरोप आम्हाला मिळाला आणि आम्ही लगेच परतीची फ्लाइट पकडली. मुंबईला विमातळावर पोहोचताच आम्हाला ही गोड बातमी मिळाली आणि आम्ही तडक रुग्णालय गाठले. ‘
आपल्या मुलीच्या जन्मामुळे श्रेयस आणि दिप्ती दोघेही अतिशय आनंदात आहेत. सरोगसीचा पर्याय का निवडला याबाबतही श्रेयसनं खुलासा केला. ‘आरोग्याशी निगडीत काही तक्रारी असल्यानं डॉक्टरांनी आम्हाला सरोगसीचा सल्ला दिला. आम्ही दोघांनी पूर्ण विचार करून या निर्णायाला होकार दिला. आमच्या आयुष्यातील हा सर्वात सुंदर निर्णय होता’ असंही श्रेयस म्हणाला.