अल्पवयीन मुलीवर शौचालयात बलात्कार करण्यात आल्याचा धक्कादायक प्रकार ठाण्यातील मनोरमानगरमध्ये घडला असून पोलिसांनी आरोपीला अटक केली आहे. या प्रकाराने परिसरात खळबळ उडाली असून कापुरबावडी पोलिस ठाण्यात गुन्हा दाखल करण्यात आला आहे.
रमेश विजयबहादूर सिंग (४५) असे या आरोपीचे नाव आहे. आरोपी हा सुरक्षारक्षकाचे काम करतो. तसेच, कोलशेत रोड परिसरात राहतो. तर पीडित आठ वर्षांची मुलगी मनोरमानगर भागात कुटुंबासह राहत असून तिच्या वडिलांचे दुकान आहे, अशी माहिती एका पोलिस अधिकाऱ्याने दिली.
आरोपीने या मुलीवर दोनदा अत्याचार केला आहे. २९ एप्रिल आणि ६ मे रोजी मनोरमानगरमध्ये असलेल्या या शौचालयात आरोपी जबरदस्तीने घुसला आणि या मुलीवर बलात्कार केला. याबाबत मुलीच्या घरी समजल्यानंतर मुलीच्या वडिलांनी कापुरबावडी पोलिस ठाण्यात धाव घेत तक्रार नोंदवली. त्यानुसार पोलिसांनी आरोपीला तात्काळ रविवारी रात्री आठ वाजता अटक केली. न्यायालयाने आरोपीला पोलिस कोठडी दिली असल्याची माहिती पोलिसांनी दिली.