नोकरीवरून काढून टाकल्यास प्रेमसंबंधात अडसर येईल, या भीतीने सिद्धेश ताम्हणकर याने प्रेयसी खुशी सेजवानी हिच्या मदतीने कीर्ती व्यास हिची हत्या करण्याचा कट रचल्याचे पोलिस चौकशीत उघड झाले आहे. कीर्तीची १६ मार्च रोजीच हत्या करून तिचा मृतदेह वडाळ्यातील आयनॉक्स थिएटरजवळील नाल्यात फेकून देण्यात आला. त्यामुळे आता क्राइम ब्रँचसमोर कीर्तीचा मृतदेह शोधण्याचे मोठे आव्हान उभे ठाकले आहे. नवी मुंबईतील पोलिस निरीक्षक अश्विनी बिंद्रे यांचा मृतदेह शोधण्यातील अडचणींप्रमाणेच कीर्तीचा मृतदेह शोधण्यासाठी पोलिसांना प्रयत्नांची पराकाष्ठा करावी लागणार आहे.
अंधेरी पश्चिमेतील कंपनीत बड्या हुद्द्यावर असलेल्या कीर्ती व्यास हिला १६ मार्च रोजी गाडीत बसवून कार्यालयात नेण्याचा बहाणा रचण्यात आला. त्यासाठी सिद्धेश आणि खुशी हे दोघेही सुमारे पाऊण तास चर्नी रोड येथील तिच्या इमारतीखाली उभे होते. आतापर्यंत कधीही याप्रकारे सहकाऱ्यांसोबत गाडीतून कार्यालयात न जाणाऱ्या कीर्तीची समजूत काढण्यात दोघांना यश आले नाही आणि त्यातूनच तिची हत्या करण्यात आली. कीर्ती हिने सिद्धेशला नोटीस दिल्याने त्याची नोकरी जाण्याची शक्यता होती. या कार्यालयात नोकरी करतानाच सिद्धेश याचे खुशी हिच्याशी प्रेमसंबंध निर्माण झाले होते. नोकरी गेल्यास आपल्या संबंधावरही परिणाम होईल, अशी भीती सिद्धेशने दाखवली. नोकरी गेल्यास दुरावा निर्माण होईल, अशी भीती निर्माण झाल्याने सिद्धेश आणि खुशी यांनी कीर्तीचा काटा काढण्याचा डाव रचला. त्यासाठी प्रथम कीर्तीची समजूत काढण्याचा प्रयत्न झाला, मात्र तो अपयशी ठरल्याने गाडीतच तिची हत्या करण्यात आली. त्यानंतर मृतदेहाची वासलात कशी लावायची हा प्रश्न दोघांसमोर उभा राहिला. त्यावर उपाय म्हणून त्यांनी वडाळ्यातील आयनॉक्स थिएटरजवळील नाल्यात तिचा तुकडे केलेला मृतदेह फेकून दिले.
क्राइम ब्रँच युनिट दोनने यशस्वी तपास करून दोघांनाही अटक केली. त्यांच्या चौकशीत कीर्तीची हत्या करून मृतदेह नाल्यात फेकल्याची कबुली त्यांनी दिल्याचे समजते. त्यामुळे क्राइम ब्रँचच्या अधिकाऱ्यांसमोर कीर्तीचा मृतदेह शोधण्याचे आव्हान उभे राहिले आहे. यापूर्वी नवी मुंबईत पोलिस अधिकारी अभय कुरुंदकर याने पोलिस निरीक्षक अश्विनी बिंद्रे यांची हत्या घडवून मृतदेह खाडीत फेकल्याच्या गुन्ह्याचा संदर्भ आला आहे. तिथेही मृतदेह शोधण्यासाठी पोलिसांनी मोठ्या प्रमाणावर प्रयत्न केले. आता कीर्तीचा मृतदेह नाल्यात फेकल्याने तो शोधण्यासाठी क्राइम ब्रँच शर्थीने प्रयत्न करणार आहे.