दुधाचे भाव उतरले असल्याने शेतकऱ्यांनी जिल्हाधिकारी कार्यालयासमोर ‘फुकट दूध वाटप’ आंदोलनाद्वारे आणि पाषाणाला दुधाचा अभिषेक करून राज्य सरकारचा प्रतिकात्मक निषेध केला.
किसान सभा, शरद जोशी विचारमंच संघटना, प्रहार संघटना यांच्या वतीने हे आंदोलन करण्यात आले. आंदोलनात अजित अभ्यंकर, वसंत पवार, नंदा जाधव, विठ्ठल पवार, नाथा शिंगाडे, अमोल वाघमारे, सुरेश शिंदे आदी सहभागी झाले होते. दुधाचे भाव कमी झाल्यामुळे शेतकऱ्यांना आर्थिक भुर्दंड सहन करावा लागत आहे.
राज्य सरकारने जाहीर केलेला भाव आणि प्रत्यक्षात मिळत असलेल्या भावात सुमारे दहा रुपयांची तफावत आहे. त्यामुळे शेतकऱ्यांनी फुकट दूध वाटून संताप व्यक्त केला. सरकारने दुधाला प्रतिलिटर २७ रुपये भाव देणे बंधनकारक केले आहे. मात्र, सध्या दुधाला केवळ १८ रुपये भाव देण्यात येत आहे. सरकारने जाहीर केलेल्या दराप्रमाणे बाजारात शेतीमालाला भाव मिळत नसल्यास आधार भाव आणि प्रत्यक्ष भाव यातील फरक भरून देण्यासाठी अनेक राज्यांमध्ये ‘भावांतर योजना’ राबविली जाते. ही योजना लागू करण्याची मागणी आंदोलकांनी केली.