पुण्यातील वैदेही रेड्डी या विद्यार्थिनीची अमेरिकेतील कॉर्नेल विद्यापीठाच्या (न्यूयॉर्क) पावणेदोन कोटी रुपयांच्या प्रतिष्ठेच्या शिष्यवृत्तीसाठी निवड करण्यात आली आहे. पुढील चार वर्षांच्या ‘बॅचलर ऑफ फाइन आर्ट्स’ (बीएफए) या संपूर्ण पदवी अभ्यासक्रमासाठी ही शिष्यवृत्ती प्रदान करण्यात आली आहे. वैदेही सध्या बारावीत असून, येत्या ऑगस्ट महिन्यापासून या शिष्यवृत्ती अंतर्गत तिचे पुढील शिक्षण सुरू होणार आहे.
कॉर्नेल विद्यापीठाला १५३ वर्षांचा गौरवशाली इतिहास असून, अमेरिकेतील सर्वोत्तम सात खासगी विद्यापीठांतील (आयव्ही लीगमधील) तिसऱ्या क्रमांकाचे हे विद्यापीठ आहे. जगभरातील निवडक विद्यार्थ्यांना येथे दरवर्षी प्रवेश दिला जातो. त्याअंतर्गत अतिशय खडतर निवडप्रक्रियेच्या माध्यमातून वैदेहीची निवड करण्यात आली आहे. या शिष्यवृत्तीत चार वर्षांच्या शिक्षणासह राहण्याखाण्याचा आणि महाविद्यालयीन साहित्याचा खर्चही समाविष्ट असणार आहे.
‘बॅचलर ऑफ फाइन आर्ट्स’ अंतर्गत वैदेहीला चित्रकला, तत्वज्ञान, मानसशास्त्र, वास्तूरचनाशास्त्र यासह अनेक सर्जनशील अभ्यासक्रम शिकायला मिळतील. हडपसर येथे वास्तव्यास असणाऱ्या वैदेहीचे वडील लष्करी अधिकारी म्हणून कार्यरत आहेत.
आंतरराष्ट्रीय पातळीवर पुण्याचे नाव मोठे करण्यात गेली काही वर्षे वैदेहीचे नाव नेहमीच आघाडीवर राहिले आहे. काही वर्षांपूर्वी ‘गुगल’ने घेतलेल्या ‘गुगल डूडल’ आंतरराष्ट्रीय स्पर्धेत वैदेहीने रेखाटलेले डूडल सर्वोत्तम म्हणून निवडले गेले होते. तसेच, गुगलच्याच ‘वेब रेंजर’ स्पर्धेचीही ती विजेती ठरली होती. त्या वेळी तिला ‘गुगल’च्या अमेरिकेतील मुख्यालयात जाण्याची संधीही मिळाली होती.
मला ही शिष्यवृत्ती मिळाल्यामुळे अतिशय आनंद झाला आहे. लहानपणापासून जे मला आवडते, त्याच कलाक्षेत्रात पुढचे शिक्षण घ्यायला मिळेल, हे महत्त्वाचे आहे. माझ्या प्रत्येक पावलाला माझ्या आईवडिलांनी दिलेला पाठिंबा महत्त्वाचा ठरला. त्यांनी मला कधीही इतरांच्या वाटेने जाण्याचा आग्रह केला नाही. माझी वाट मला निवडू दिली.