अल्पवयीन मुलींचे लैंगिक शोषण केल्याचे पाप आपल्यासारख्या ब्रह्मज्ञानीला लागत नाही, अशी स्वयंघोषित अध्यात्मिक गुरू आसाराम बापू याची धारणा होती, अशी साक्ष फिर्यादी साक्षीदार आणि आसारामचा तत्कालीन अनुयायी राहुल सचर याने बुधवारी येथील न्यायालयात झालेल्या सुनावणीदरम्यान दिली. आपली लैंगिक क्षमता वाढवण्यासाठी आसाराम औषधे घेत असे तसेच तो अफूची नशाही करत असे, असेही सचर याने न्यायालयात शपथेवर सांगितले.
उत्तर प्रदेशमधील एका अल्पवयीन मुलीवर सुमारे पाच वर्षे बलात्कार केल्याच्या आरोपाखाली जोधपूरच्या विशेष न्यायालयाने बुधवारी आसाराम बापूला मरेपर्यंत जन्मठेपेची शिक्षा ठोठावली. या खटल्याच्या सुनावणीदरम्यान साक्षीदार राहुल सचर याने आसारामविषयीच्या अनेक बाबी न्यायालयासमोर उघड केल्या. राहुल आसारामच्या जवळच्या अनुयायांपैकी एक असल्याने त्याला आसारामच्या कुटीमध्ये थेट प्रवेश मिळत असे. सन २००३ मध्ये आपण आसारामला पुष्कर (राजस्थान), भिवनी (हरयाणा) व अहमदाबाद (गुजरात) येथील आश्रमांमध्ये मुलींचे लैंगिक शोषण करताना पाहिले. आश्रमात येणाऱ्या मुलींपैकी शोषणासाठी निवड करण्यासाठी आसाराम त्याच्यासोबत राहणाऱ्या तीन मुलींसोबत फेरफटका मारत असे. फेरफटका मारताना आसाराम एखाद्या मुलीवर टॉर्चचा प्रकाश टाकत असे. हा सिग्नल ओळखून त्याच्यासोबत राहणाऱ्या मुली त्या मुलीला आसारामच्या कुटीमध्ये घेऊन जात असत, अशी माहिती राहुलने न्यायालयात दिली. राहुलने आपल्या साक्षीत असे म्हटले आहे की, या विरोधात आपण आसारामला दोनवेळा लिहिलेल्या पत्राची त्याने दखल घेतली नाही. त्यामुळे आपण थेट कुटीमध्ये जाऊन त्याला जाब विचारला. तेव्हा आसाराम म्हणाला की, हे सर्व केले तरी ब्रह्मज्ञानीला पाप लागत नाही. त्यावर राहुलने त्याला विचारले की, ब्रह्मज्ञानीच्या मनात अशाप्रकारची इच्छा कशी उत्पन्न होऊ शकते. हा प्रश्न ऐकताच निरुत्तर झालेल्या आसारामने त्याला आश्रमाबाहेर हाकलून लावले होते. राहुलने आसारामचा आश्रम सोडल्यानंतर २००४मध्ये त्याच्यावर हल्लादेखील करण्यात आला होता.