अमेरिकन डॉलर देण्याच्या बहाण्याने ७० हजार रुपये घेऊन त्याबदल्यात रद्दी देऊन एका व्यक्तीची फसवणूक केल्याचा प्रकार समोर आला आहे. या प्रकरणी दत्तवाडी पोलिस ठाण्यात फसवणुकीचा गुन्हा दाखल करण्यात आला आहे.
याबाबत गणेश इकारे (वय ३०, रा. गोकुळनगर, कोंढवा बुद्रुक) यांनी तक्रार दिली आहे. त्यानुसार तिघांवर गुन्हा दाखल करण्यात आला आहे. पोलिसांनी दिलेल्या माहितीनुसार, गणेश इकारे हे मगरपट्टा सिटी येथे चालक म्हणून नोकरीला आहेत. पाच एप्रिल रोजी दुपारी दीडच्या सुमारास एक जण त्यांच्याकडे आला. त्याने स्वत:चे नाव मुकेश सांगितले. ही नोट माझ्या वेडसर मित्राला सापडली आहे. ती कसली आहे सांगाल का, असे विचारले. इकारे यांनी ही अमेरिकन डॉलरची नोट आहे, असे सांगितले. हे बँकेतून बदलून घेतल्यास पैसे मिळतील, असेही सांगितले. त्या वेळी संबंधित व्यक्तीने माझ्या मित्राकडे अशा १२७६ नोटा आहेत. त्या तुम्ही बदलून द्या, त्याबदल्यात मी तुम्हाला पैसे देतो, अशी त्यांना बतावणी त्यांनी केली. इकारे यांनी ‘माझ्याकडे एवढे पैसे नाहीत. ७० हजार रुपयांचे डॉलर मी घेतो,’ असे सांगितले. त्या वेळी दोघांनीही एकमेकांचा मोबाइल क्रमांक घेतला. आरोपीने इकारे यांना फोन करून १० एप्रिल रोजी पर्वती पायथ्याजवळील कॅनॉलजवळ बोलविले. इकारे हे त्या ठिकाणी गेले असता दोघे जण तेथे आले. त्यातील एकाने वेडसर असल्याचे नाटक केले. इकारे यांना एक पिशवी दिली. त्यांच्याकडून ७० हजार रुपये घेतले. या आरोपीने वेडसर व्यक्तीला सोडून येतो, तो पर्यंत गाडीत बसा, असे सांगितले.
इकारे हे गाडीत बसल्यानंतर हे दोघेही तेथून पसार झाले. इकारे यांनी पिशवीतील गठ्ठा उघडून पाहिला असता, त्यामध्ये रद्दी निघाली. फसवणूक झाल्याचे लक्षात आल्यानंतर त्यांनी दत्तवाडी पोलिसांकडे धाव घेतली.