महसूल आणि वन विभागात अधीक्षक या पदाची नोकरी मिळवून देण्याचे आमिष दाखवून तरुणाची साडेचार लाखांची फसवणूक करण्यात आली आहे. याबाबत राजेंद्र शिवाजी कापसे (रा. कात्यायणी चौक, कळंबा, आणि महावीर चोका कांबळे (रा. उदगाव, ता. शिरोळ) या दोघांवर करवीर पोलिस ठाण्यात फसवणुकीचा गुन्हा दाखल झाला आहे. राकेश सूर्यकांत हिंगमिरे (रा. राजापूर, ता. शिरोळ) या तरुणाने फिर्याद दाखल केली आहे
करवीर पोलिसांनी दिलेल्या माहितीनुसार, राजेंद्र कापसे आणि महावीर कांबळे या दोघांनी फिर्यादी राकेश हिंगमिरे याला नोकरी लावण्याचे आमिष दाखवले होते. यासाठी त्यांनी कापसे याला कळंब्यातील कात्यायणी चौकातील घरात बोलवून घेतले. महसूल किंवा वनविभागात अधीक्षक पदावर नोकरी लावतो, असे सांगून त्याच्याकडून ४ लाख, ५० हजार रुपये घेतले. डिसेंबर २०१४ पासून त्याच्याकडून ही रक्कम घेतली. यानंतर त्याला नियुक्तीपत्राची बनावट झेरॉक्स प्रत दिली. फसवणूक झाल्याचे लक्षात येताच राकेश याने करवीर पोलिसात गुन्हा दाखल केला आहे. पोलिसांनी संशयितांचा शोध सुरू केला आहे. मात्र, दोन्ही संशयित घर सोडून पळाले आहेत. संशयितांच्या अटकेनंतर फसवणुकीची व्याप्ती वाढू शकते, अशी माहिती निरीक्षक दिलीप जाधव यांनी दिली.