महिला डब्यातला पोलिस ऑनड्युटी ढाराढूर

उपनगरीय रेल्वे गाड्यांमध्ये महिला प्रवाशांच्या सुरक्षेच्या दृष्टिकोनातून रात्री ११नंतर महिलांच्या सर्व डब्यामध्ये रेल्वे पोलिस तैनात केले जातात. मात्र रविवारी रात्री मध्य रेल्वेच्या शेवटच्या फास्ट ट्रेनमधला हा पोलिस चक्क ढाराढूर झोपल्याने महिलांची सुरक्षा रामभरोसे असल्याचे पुन्हा एकदा अधोरेखित झाले.

मुंबई छत्रपती शिवाजी महाराज टर्मिनस येथून रात्री ११.१८वाजता सुटणाऱ्या खोपोली गाडीत सुरक्षेसाठी असलेला पोलिस गाडी सुटल्यापासून बर्थवर पाय पसरून बसून फोनवर बोलत होता. कुर्ल्यानंतर त्याला डुलकी लागली आणि त्यानंतर थेट कल्याणपर्यंत तो ढाराढूर झोपला होता. रात्रीच्यावेळी स्टेशनवर असलेले गर्दुल्ले किंवा पुरुष प्रवासी महिलांच्या डब्यात शिरू नयेत म्हणून सुरक्षेसाठी महिलांच्या सर्व डब्यांमध्ये पोलिस तैनात केले जातात. मात्र रविवारी रात्री झालेल्या या प्रकारामुळे हे पोलिस खरेच महिलांच्या सुरक्षेसाठी आहेत का, असा प्रश्न उपस्थित झाला आहे. या गाडीतून प्रवास करणाऱ्या एका महिला प्रवाशाने या पोलिसाबाबत ट्विटरवरून जीआरपी आणि रेल्वे पोलिसांनी माहिती दिली. त्यानंतर या प्रकराबाबत चौकशी करून योग्य ती कारवाई केली जाईल, असे आश्वासन मध्य रेल्वेचे रेल्वे पोलिस उपायुक्त समाधान पवार यांनी दिले.