जातीय व धार्मिक मुद्द्यावरून ढवळून निघालेल्या कर्नाटक राज्याच्या विधानसभा निवडणुकांची घोषणा आज राष्ट्रीय निवडणूक आयोगानं केली. कर्नाटकमध्ये येत्या १२ मे रोजी एकाच टप्प्यात मतदान होणार असून निवडणुकीचा निकाल १५ मे रोजी जाहीर होणार आहे. देशाचं राजकारण नेमकं कोणत्या दिशेनं जाणार व २०१९मध्ये जनमताचा कल काय असेल, हे ठरविणारी ही निवडणूक असल्यानं त्याकडं संपूर्ण देशाचं लक्ष लागलं आहे.
कर्नाटकात विधानसभेच्या एकूण २२४ जागांसाठी मतदान होणार आहे. ४ कोटी ९६ लाख मतदार या निवडणुकीत मतदानाचा हक्क बजावतील. मतदान ईव्हीएम मशिनद्वारेच होणार असून व्हीहीपॅट प्रणालीचाही वापर करण्यात येईल, असं मुख्य निवडणूक आयुक्त ओपी रावत यांनी स्पष्ट केलं.
असं आहे वेळापत्रक
अधिसूचना : १७ एप्रिल
अर्ज भरण्याची अंतिम मुदत – २४ एप्रिल
अर्ज छाननी : २६ एप्रिल
अर्ज मागे घेण्याची तारीख : २७ एप्रिल
मतदान – १२ मे
मतमोजणी – १५ मे
२०१९ची दिशा ठरणार!
कर्नाटकमध्ये सध्या काँग्रेसची सत्ता आहे. सिद्धरामय्या यांच्या हाती सत्तेची सूत्रे असून काँग्रेसनं पुन्हा एकदा त्यांनाच मुख्यमंत्रिपदाचा चेहरा म्हणून पुढं केलं आहे. तर, भाजपची मदार पुन्हा एकदा माजी मुख्यमंत्री व लिंगायत समाजातील वजनदार नेते बी. एस. येड्डियुरप्पा यांच्यावर असेल. दोन्ही पक्षांनी आगामी निवडणुकीच्या दृष्टीनं जोरदार मोर्चेबांधणी केली आहे. दक्षिणेकडील हे महत्त्वाचं राज्य कसंही करून पुन्हा काबीज करण्याचा भाजपचा प्रयत्न आहे. तर, कोणत्याही परिस्थितीत कर्नाटक राखायचंच, या निर्धारानं काँग्रेस प्रचारात उतरली आहे.