बलात्काराचे आरोप असलेल्या खासगी शाळेच्या ट्रस्टीविरोधात पुरावे असूनही त्याला सत्र न्यायालयात जामीन मिळतो. ही बाब गंभीर असल्याचे ताशेरे उच्च न्यायालयाच्या न्यायमूर्ती रेवती मोहिते-ढेरे यांनी ओढले. या ट्रस्टीला पुढील सुनावणीपर्यंत शाळेत प्रवेश देऊ नका, असे स्पष्ट निर्देश त्यांनी सोमवारी सुनावणीदरम्यान दिले.
गेल्या वर्षी अंधेरी येथील एका खासगी इंटरनॅशनल शाळेमध्ये शिक्षण घेणाऱ्या तीन वर्षांच्या मुलीवर बलात्कार केल्याचा आरोप या शाळेच्या ट्रस्टीवर आहे. यासंदर्भात आरोपीविरोधात पीडित मुलीने माहिती देऊनही उशिरा गुन्हा दाखल करण्यात आला. त्याचबरोबर सत्र न्यायलायाने २४ नोव्हेंबर रोजी त्याला जामीनही मंजूर केला. सत्र न्यायालयाच्या या निर्णयाला या मुलीच्या आईने उच्च न्यायालयात आव्हान दिले होते. याशिवाय शाळेतल्या ४२ मुलांच्या पालकांनीही यासंदर्भात अर्ज केला होता. या पार्श्वभूमीवर न्यायमूर्ती ढेरे यांनी हे आदेश दिले आहेत.