नवी मुंबई परिसरात महानगर गॅस या कंपनीचा कर्मचारी असल्याचे सांगून घरातून सोन्याचा ऐवज चोरी करणाऱ्या चोरास नेरुळ पोलिसांनी अटक केली. प्रमोद कृष्णा मयेकर (४५) असे या चोराचे नाव असून तो नायगाव येथील आहे. त्याच्याकडून ९३ हजार रुपये किमतीचा मुद्देमाल हस्तगत करण्यात आला.
नवी मुंबई परिसरात महानगर गॅसचा कर्मचारी असल्याचे सांगून घरात प्रवेश करून घरातून मौल्यवन वस्तूचा ऐवज चोरण्याचे प्रकार सुरू आहेत. त्यामुळे पोलिस आयुक्त हेमंत नगराळे यांच्या मार्गदर्शनाखाली नवी मुंबई पोलिसांनी या आरोपीचा शोध घेण्याची विशेष मोहीम सुरू केली होती. नेरुळ पोलिस ठाण्याचे वरिष्ठ पोलिस निरीक्षक अशोक राजपूत यांच्या पथकाला मिळालेल्या माहितीनुसार प्रमोद मयेकर याला अटक करण्यात आली. प्रमोदकडे अधिक तपास केला असता त्याने आणखी दोन गुन्हे केल्याची कबुली दिली. आरोपीने केलेल्या गुन्ह्यातील ३० ग्रॅम वजनाचे ७० हजार रुपयांचे दागिने, ७० हजार रुपये किमतीचा ऐवज, तसेच १२ हजार रुपये रोख रुक्कम, ११ हजार रुपये किमंतीचे ४ मोबाइल, सिंडिकेट बँकेचे चेकबुकसह डेबिट कार्ड असा एकूण ९३ हजार रुपये किमतीचा मुद्देमाल हस्तगत करण्यात आला.