युनियन बँकेच्या व्यवस्थापकाच्या कारची काच फोडून शिपायाचा गळा दाबून चोरट्यांनी बँकेचे ११ लाख रुपये चोरून नेले. नगर शहरातील चांदणी चौकाजवळ मंगळवारी बारा वाजण्याच्या सुमारास ही चोरी झाली. पल्सरवरून आलेल्या चार चोरट्यांनी ही रक्कम चोरली असून, याप्रकरणी भिंगार कॅम्प पोलिस स्टेशनला अज्ञात चोरट्यांविरुद्ध गुन्हा नोंदवण्यात आला आहे.
कर्जतमधील निमगाव गांगर्डी शाखेचे व्यवस्थापक महेशकुमार सदगुरु कात्रजकर (वय ३२. जामखेड) यांच्या फिर्यादीवरून भिंगार कॅम्प पोलिस स्टेशनला गुन्हा नोंदविण्यात आला आहे. निमगाव येथील शाखेत रोकड कमी असल्यामुळे कात्रजकर हे स्वतःच्या स्विफ्ट गाडीतून नगरला आले होते. तर शिपाई नाथू किसन गोरे हा नगरला राहत असल्याने त्याला कोठला स्टॅण्डवर थांबविण्यात आले होते. शिपाई गोरे यांना घेऊन कात्रजकर हे युनियन बँकेच्या सावेडीतील मुख्य शाखेत आले. या शाखेतून अकरा लाख रुपयांची रक्कम घेऊन ती कारमध्ये ठेवली होती. आणखी पाच लाख रुपये घेण्यासाठी कात्रजकर व शिपाई हे रेल्वे स्टेशन रोडवरील युनियन बँकेत आले होते. या शाखेत जास्त रक्कम नसल्याने ते अकरा लाख रुपये घेऊन नगर-सोलापूर रोडने निमगाव शाखेकडे जात होते. रोकड असलेली बॅग शिपाई गोरे यांनी दोन्ही पायाच्यामध्ये ठेवली होती. चांदणी चौकातून काही अंतर गेल्यानंतर कारला आदळल्याचा जोराचा आवाज आला. त्यामुळे कात्रजकर यांनी गाडी थांबविली. त्यावेळी पल्सरवर दोघे जण होते. त्यातील एक जण ओरडत होता. त्याचवेळी दुसऱ्या पल्सर मोटारसायकलवरून आलेल्या दोघांपैकी एकाने कारची काच फोडली. एकाने शिपाई गोरे यांचा गळा धरून दुसऱ्या चोरट्याने पैसे असलेली ११ लाख रुपयांची बॅग हिसकावून घेतली. त्यानंतर दोन्ही पल्सरवरील चौघे चोरटे पसार झाले. त्यानंतर कारमधील पैशाची बॅग चोरीला गेल्याचे शिपाई गोरे यांनी व्यवस्थापक कात्रजकर यांना सांगितले.
या प्रकरणी भिंगार कॅम्प पोलिस स्टेशनला माहिती देण्यात आली. सहायक पोलिस अधीक्षक अक्षय शिंदे, स्थानिक गुन्हे शाखेचे पोलिस निरीक्षक दिलीप पवार, कॅम्पचे सहायक पोलिस निरीक्षक संदीप पाटील या अधिकाऱ्यांनी घटनास्थळी येऊन कारची पाहणी केली. या चोरीनंतर शहरातील महामार्गावरील चौकांमध्ये, अंतर्गत भागात नाकेबंदी करून वाहने तपासण्यात आले. तोपर्यंत चोरटे पसार झाले होते.
बँकेचा निष्काळजीपणा
बँकेतील इतर शाखांमध्ये रोकड नेत असताना कॅश व्हॅनचा वापर केला जातो. या व्हॅनबरोबर सुरक्षारक्षक असतात. परंतु कोणतीही सुरक्षा न घेता ही रक्कम कारमधून नेण्यात येत होती. त्यामुळे बँकेचा निष्काळजीपणा यात दिसून येत आहे. चांदणी चौकाजवळ नेहमीच गर्दी असते. गर्दीच्या ठिकाणावरून ही रक्कम चोरीला गेली आहे. पाळत ठेवून चोरट्यांनी ही चोरी केली असावी, असा संशय पोलिस अधिकाऱ्यांना आहे. चोरी झालेल्या परिसरात सीसीटीव्ही कॅमेरे आहेत का याबाबत पोलिसांनी चौकशी केली. परंतु परिसरात कुठेही सीसीटीव्ही कॅमेरे दिसून आले नाहीत.