पाकिस्तानातल्या नवाझ शरीफ सरकारविरोधात बंडाचं निशाण फडकवणारे पाकिस्तानचे नेते आणि माजी क्रिकेटपटू इम्रान खान यांच्याविरोधात खळबळजनक आरोप करण्यात आले आहेत. पाकिस्तान तहरीक-ए-इन्साफ (पीटीआय) पक्षाचे प्रमुख इम्रान खान यांच्यावर त्यांच्याच पक्षाच्या महिला नेत्याने अश्लील मेसेज पाठवल्याचा आरोप केला आहे. तहरीक-ए-इन्साफच्या नेत्या आयशा गुलालई यांनी इम्रानवर आरोप केल्यानंतर पक्ष सदस्यत्व आणि खासदारकी दोहोंचा राजीनामा दिला आहे.
पक्षातल्या महिला नेत्यांच्या छळणुकीचा आरोप आयशा यांनी केला आहे. पक्षाने हा आरोप फेटाळला आहे. आयशा यांनी पैशांसाठी हे आरोप केले आहेत. त्यांनी पाकिस्तान मुस्लिम लीग-नवाझ (पीएमएलएन) पक्षाला आपला आत्मसन्मान विकल्याचा आरोप पीटीआय पक्षाने केला आहे. आयशा या दक्षिण वझीरिस्तानच्या आदिवासी भागाचं प्रतिनिधीत्व करतात. त्यांच्या पक्षात महिला सुरक्षित नाहीत, असा आरोप त्यांनी पत्रकार परिषदेत केला. ‘माझ्यासाठी इमानदारी महत्त्वाची आहे. माझा आत्मसन्मान आणि अब्रुचा प्रश्न असेल तिथे मी तडजोड करणार नाही,’ असं म्हणत त्यांनी राजीनामा दिला.
इम्रान खान पक्षाच्या महिला नेत्यांना अश्लील मेसेज पाठवतात. हे मेसेज इतके हिन दर्जाचे आहेत की ते सहन होत नाहीत, असा आरोप आयशा यांनी केला आहे. खैबर पख्तुनवाच्या पीटीआय सरकार आणि मुख्यमंत्री परवेज खट्टक यांच्यावरही आयशा यांनी भ्रष्टाचाराचा आरोप केला आहे. इम्रान खान यांना तर त्यांनी चारित्र्यहिन आणि दोन नंबरचा पठाण असं संबोधलं आहे. इम्रान यांना पाकिस्तान म्हणजे इंग्लंड वाटतं, असंही त्या म्हणाल्या. पीएमएलएन पक्षात त्या सामील होणार नाहीत, पण त्यांनी नवाझ शरीफ यांचे कौतुक केले आहे. नवाझ शरीफ भ्रष्ट असू शकतात, पण महिलांची अब्रु न राखण्याचा आरोप त्यांच्यावर कधीच होणार नाही, असं त्या म्हणाल्या.