भांडुपच्या पालिका बाजार इमारतीत एका दुकानात कामाला असलेली १९ वर्षीय काजल शिंदे ही पगार मागायला आल्याने राग अनावर झालेल्या मालकानेच तिच्यावर कटरने हल्ला केला.
काजल आणि तिची बहीण चित्रा या दोघी भांडुपच्या ड्रीम मॉलमागील पालिकेच्या बाजार इमारतीत आयडिया सेल्युलर कंपनीच्या टेलिकॉलर एजन्सीमध्ये काही महिन्यांसाठी काम करीत होत्या. मागील एका महिन्याचा पगार मालकाने दिला नसल्याने त्या वारंवार मालकाला फोन करून ठरलेला पगार, प्रत्येकी सात हजार रुपये मागत होत्या. यावर त्यांचा टीम लीडर अनिकेत गायकवाड (२३) याने या तरुणींना ड्रीम मॉलच्या तिसऱ्या माळ्यावर येऊन पगार नेण्यास सांगितले. त्याने प्रथम काजलला एकटीला वर येण्यास सांगितले. ती वर जाताच अनिकेतने चाकूने तिच्या चेहऱ्यावर, हातावर चार वार केले. तो तिचा मोबाइल हिसकावून तिथून पळाला. चित्राला हे कळताच तिने ताबडतोब काजलला अग्रवाल रुग्णालयात उपचारासाठी दाखल केले.भांडुप पोलिस आरोपीचा शोध घेत असून पुन्हा एकदा भांडुपचा ड्रीम मॉल चर्चेत आला आहे. इथल्या सुरक्षेचा प्रश्न पुन्हा ऐरणीवर आला आहे.