पोलिसांनी दिलेल्या माहितीनुसार, रविवारी थरमॅक्स कंपनीतील पंधरा कर्मचारी पावसाळी सहलीसाठी वेल्हा येथे गेले होते. संध्याकाळी पाच वाजण्याच्या सुमारास मढेघाट येथून सर्व जण परतीच्या प्रवासाला निघाले. दरम्यान, जोरदार पाऊस आणि दाट धुक्यात अचानक रमेश माने सोबत नसल्याचे सर्वांच्या लक्षात आले. मित्रांनी आरडाओरड करून माने यांचा शोध घ्यायला सुरुवात केली. मात्र, मुसळधार पाऊस आणि धुक्यामुळे त्यांचा थांगपत्ता लागला नाही. केळद गावच्या ग्रामस्थांना घेऊन रात्री दहा वाजेपर्यंत शोधाशोध करूनही माने सापडले नाहीत. शेवटी मध्यरात्री वेल्हे पोलिस ठाण्यात माने यांचे मित्र प्रवीण सदामत यांनी ते हरवल्याची तक्रार दाखल केली.
सोळा तास प्राणाशी गाठ
धबधब्याच्या परिसरात माने उंच कड्यावरुन खाली कोसळले. कोसळताना ते दरीतील झाडाला लटकले. रविवारी संध्याकाळी पाच ते दुसऱ्या दिवशी सकाळी नऊ वाजेपर्यंतचे १६ तास ते खोल दरीत तशाच अवस्थेत लटकून राहिले.
‘कड्यावर जाऊ नका’
मढेघाट परिसरात दाट धुके आणि पावसामुळे वाटा निसरड्या झाल्या आहेत. त्यामुळे पर्यटकांनी या परिसरात फिरताना धबधब्याच्या माथ्यावर जाण्याचा मोह टाळावा तसेच कड्याच्या टोकाशी जाऊन फोटो काढण्याच्या फंदात पडू नये, असे आवाहन वेल्हा पोलिसांनी केले आहे.