रामपूर जिल्ह्यातील दर्शनपूरमधील प्राथमिक शाळेत उन्हाळी सुट्टीत शाळेच्या मुख्याध्यापकांनी रिकाम्या वर्गांमध्ये कुक्कुटपालन केल्याची घटना समोर आली आहे. या घटनेचा व्हिडिओ अपलोड झाल्यानंतर हा सर्व प्रकार उघड झाल्याचे येथील मुलभूत शिक्षण अधिकारी सर्वा नंद यांनी सांगितले. या प्रकरणी जिल्हा दंडाधिकाऱ्यांना कळविण्यात आल्यानंतर मुख्याध्यापकांना निलंबित करण्यात आले आहे.
जिल्हा दंडाधिकारी शिव सहाय अवस्थी यांनी चौकशीचे आदेश दिले असून प्राथमिक चौकशीदरम्यान, २१ मे पासून शाळेला उन्हाळी सुट्टी लागल्यानंतर शाळेचे मुख्याध्यापक फर्याद अली खान यांनी शाळेतील तरुण शिक्षक प्रयाग कुमार यांना हाताशी घेऊन वर्गांमध्ये पोल्ट्री फार्म सुरू केल्याचे समजले. इतकंच नव्हे तर शाळेच्या परिसरात इतर ग्रामस्थांचे पशुपक्षीही यादरम्यान आढळून आले.
हा सर्व प्रकार गावातील महिला सरपंचांच्या पतीच्या सहमतीने केला गेला असल्याचे दोषी शिक्षक प्रयाग कुमार यांनी सांगितले. आपली बाजू मांडताना ते सांगतात की, ” उन्हाळी सुट्टी सुरू झाल्यानंतर आम्ही शाळेला कुलूप लावून चाव्या ग्रामपंचांकडे सुपूर्द केल्या होत्या, जे स्वतः या शाळेच्या व्यवस्थापन समितीचे अध्यक्ष आहेत. शिक्षक म्हणून आपली ही पहिलीच पोस्टिंग असल्याने करिअरवर कोणतीही बाधा येऊ नये म्हणून नाईलाजास्तव मुख्याध्यापकांच्या या कृत्यात सहभागी व्हावे लागले.”
या प्रकरणात ब्लॉक शिक्षण अधिकाऱ्यांनाही नोटिस बजावण्यात आली असून हा सगळा प्रकार संपूर्ण शिक्षण विभागालाच लाज आणणारा असल्याचं जिल्हा दंडाधिकाऱ्यांनी म्हटलं आहे. यापुढे असा कोणताही बेजबाबदारपणा खपवून घेतला जाणार नसल्याचे सांगत त्यांनी शिक्षण विभागाला जिल्ह्यातील सर्व शालेय इमारती आणि परिसराची पाहणी करण्याचे आणि दोषींविरोधात गुन्हा दाखल करण्याचे आदेश दिले आहेत.