महाविद्यालयीन कॅालेजच्या कॅन्टीनमध्ये आचाऱ्याचे काम करून उपजीविका करणाऱ्या राहुल जैस्वालने २०१७च्या ६५व्या नॅशनल फिटनेस बॅाडी बिल्डिंग चॅम्पियन स्पर्धेत बाजी मारली आहे. मुंबईच्या रेल्वे फलाटापासून सुरू झालेला राहुलाच प्रवास खडतर होता. मात्र परिस्थितीवर मात करून नावलौकिक करणाऱ्या राहुलच्या या यशाचे सर्व स्तरावर कौतुक केले जात आहे.
मूळ उत्तर प्रदेशच्या जौनपूरचा असलेल्या राहुलच्या घरची परिस्थिती हालाखीची असल्याने १३व्या वर्षातच राहुलने मुंबईची वाट धरली. मुंबईत कुणीच ओळखीचे नसल्यामुळे लोकमान्य टिळक रेल्वे टर्मिनसवरच राहत होता. कालांतराने तो प्लॅटफॅार्मवरील खाद्यपदार्थाच्या दुकानात कामाला राहिला. मात्र तुटपुंज्या पैशात खर्च भागत नसल्याने सोमय्या महाविद्यालयात त्याने आचाऱ्याची नोकरी स्वीकारली. महिन्याला त्याला सहा हजार रुपये मिळत होते. व्यायामाची आवड असल्याने राहुल महाविद्यालयाच्या शेजारीच असलेल्या व्यायामशाळेत व्यायाम करू लागला. मिळणाऱ्या पगारातून कुटुंब चालवून स्वत:चा आहार सांभाळणे शक्य नव्हते. तरीही एक ध्येय बाळगून राहुल मेहनत करत होता. सकाळी कॅन्टीनमध्ये काम तर संध्याकाळी व्यायामशाळेत येणाऱ्या तरुणांना तो मार्गदर्शन करू लागला. स्वतःच आचारी असल्यामुळे पिळदार शरीरयष्ठीसाठी पोषक जेवण स्वतःच बनवत होता.
अल्पावधीतच राहुलने पिळदार शरीरयष्ठी कमावली. तो विविध स्पर्धेत भाग घेऊ लागला. आतापर्यंत विविध स्पर्धांमध्ये त्याला आठ पुरस्कार मिळाले आहेत. नुकत्याच बेंगळुरूमध्ये झालेल्या ६५व्या राष्ट्रीय फिटनेस बॅाडी बिल्डिंग चॅम्पियन स्पर्धेत राहुलने बाजी मारल्याने सर्वच स्तरावरून त्याचे कौतुक केले जात आहे. मात्र, आजही त्याच्या यशाच्या आड गरिबी आवासून उभी आहे.