पत्नीचे परपुरूषाशी संबंध असल्याच्या संशयावरून पतीने तिचे व्हॉट्सअॅप चॅट आणि कॉल रेकॉर्ड तपासण्यासाठी मोबाईल हातात घेतला, पण ते त्याला भलतेच महागात पडले. कारण मोबाईल हातात घेताच संतापलेल्या पत्नीने त्याच्यावर जोरदार हल्ला केल्याने तो बेशुद्धच झाला. भिलवाली गावात शनिवारी ही धक्कादायक घटना घडली.
नेत्रपाल असे जखमी इसमाचे नाव असून २०१४ मध्ये त्याचे नीतू सिंह हिच्याशी लग्न झाले. पण बऱ्याच काळापासून ते दोघे वेगळे राहत होते, नीतूचे दुसऱ्या पुरूषाशी प्रेमसंबंध होते. गेल्या महिन्यात एका समारंभासाठी ती सासरी आली होती.
‘ शनिवारी रात्री नीतू व्हॉट्सअॅपवरून चॅट करत असल्याचे पाहिल्यानंतर मला संशय आला आणि मी तिच्याकडे मोबाईल मागितला. मात्र तिने तो देण्यास नकार देत मला दूर राहण्यास बजावले. मी तिच्याकडून मोबाईल हिसकावून घेतला पण तेवढ्यात तिने माझ्यावर हल्ला चढवला आणि मी बेशुद्ध पडलो,’ असे नेत्रपालने सांगितले.
नेत्रपालवर हल्ला केल्यानंतर नीतूने तिच्या कथित प्रियकरासोबत पळ काढण्याचा प्रयत्न केला पण नेत्रपालच्या घरच्यांनी तिला पकडून पोलिसांच्या ताब्यात दिले. मात्र मी निर्दोष असून नेत्रपालने स्वत:च स्वत:वर हल्ला करत मला फसवायचा प्रयत्न केला, असे दावा नीतूने केला आहे. याप्रकरणी पुढील तपास सुरू आहे.