किंग जॉर्ज मेडिकल युनिव्हर्सिटीच्या शताब्दी रुग्णालयात आपल्या पतीच्या उपचारांसाठी आलेल्या एका महिलेवर सामूहिक बलात्कार झाला आहे. दोन सुरक्षारक्षक आणि एका लिफ्टमनवर पोलिसांनी गुन्हा दाखल केला आहे. सुरक्षारक्षकांना अटक केली असून लिफ्टमन फरार आहे.
महिला हरदोईवरून आपल्या पतीच्या उपचारांसाठी बुधवारी रुग्णालयात आली होती. त्याच्यावर उपचार करणारे डॉक्टर त्या दिवशी रजेवर असल्याने दोघांनी रुग्णालयाच्या व्हरांड्यात रात्र काढायची ठरवली. रात्री १० च्या सुमारास सुरक्षा रक्षक शिवकुमार याचे या दोघांशी बोलणे झाले. त्यानंतर तो अर्ध्या तासाने परतला. तो त्यांना जेवण देण्याच्या बहाण्याने महिलेला कॅन्टीनमध्ये घेऊन जाण्यासाठी निघाला. तिला त्याच्यामागोमाग येण्यास त्याने सांगिरतले आणि तो तिला कॅन्टीनऐवजी चौथ्या मजल्यावरच्या लिफ्टरुममध्ये घेऊन गेला. तिथे त्याचे मित्र लिफ्टमन विनय आणि अन्य सुरक्षा रक्षक संतोष आधीच येऊन थांबले होते. तिथे तिघांनीही तिच्यावर बलात्कार केला. तिला कुठेही वाच्यता न करण्याची धमकी दिली.
मध्यरात्री ते पुन्हा आले आणि त्यांनी या जोडप्याला गप्प राहण्यासाठी २५ हजार रुपये देऊ केले, पण जोडप्याने ते नाकारले, तेव्हा त्यांनी जोडप्याला रुग्णालयाबाहेर हाकलले. गुरुवारी सकाळी जोडप्याने पोलिसात तक्रार दाखल केली, तेव्हा पोलिसांनी शिवकुमारला कॅन्टीनमधून अटक केली. संतोषला त्याच्या घरून सायंकाळी अटक केली.
दरम्यान, किंग जॉर्ज मेडिकल युनिव्हर्सिटीचे कुलगुरू प्रा. एम.एल.बी. भट यांनी सुरक्षा रक्षक आणि लिफ्ट मेंटनन्स अशा दोन्ही कंपन्यांना ब्लॅकलिस्ट केले आहे.