शासनाकडून शंभर रुपयांत दिल्या जाणाऱ्या ‘आनंदाचा शिधा’त मेलेले उंदीर आढळल्याचा प्रकार मोहाडी तालुक्यातील डोंगरगाव येथे समोर आला आहे. यापूर्वी नेरीत निकृष्ट आणि बुरशीयुक्त साहित्याचे वाटप करण्यात आल्याचा मुद्दा गाजला होता.
‘आनंदाचा शिधा’ उपक्रमात रवा, डाळ, साखर, तेल हे जिन्नस एकत्रित दिले जात आहेत. काही दिवसांपूर्वी मोहाडी तालुक्यातील नेरी येथे स्वस्त धान्य दुकानातून जवळपास ५०च्या आसपास लाभार्थ्यांना आनंदाचा शिधा वितरित केला होता. लाभार्थी शिधा घेऊन घरी पोहोचले असता, हरभऱ्याच्या डाळीच्या पाकिटातून दुर्गंधी आली. पाकीट उघडून पाहिले असता, किडलेली आणि बुरसटलेली निकृष्ट प्रतीची डाळ असल्याचे आढळून आले होते. या प्रकरणाची तक्रार तहसीलदारांकडे करण्यात आली होती. यावरून संताप कायम असतानाच सोमवारी डोंगरगाव येथे विजय कुंडलिक भुरे या लाभार्थ्याने ‘आनंदाचा शिधा’ घरी नेला. यातील मोठ्या पिशवीत चक्क मेलेले उंदीर मिळाल्याचा आरोप त्यांनी केला आहे.