बिटकॉइनच्या नादात लाखोंचा चुना! आधी केली मैत्री अन् नंतर महिला फरार, कळव्यातील घटना

आर्थिक फसवणुकीचे नानाविध प्रकार समोर येत असून एका महिलेने व्हॉट्सअॅपवर मेसेज पाठवून एका व्यक्तीशी ओळख करून घेतली. नंतर तिने मैत्री करत त्यांना बिटकॉइनमध्ये गुंतवणूक करण्याविषयी सांगितले. त्यांनीदेखील तिच्या बोलण्यावर विश्वास ठेवत १४ लाख रुपये गुंतवले. मात्र, नंतर ही महिला संपर्कहीन झाली. अशाप्रकारे आरोपी महिलेने लाखोंचा आर्थिक गंडा घातला असून या प्रकरणी कळवा पोलिस ठाण्यात गुन्हा दाखल झाला आहे.कळवा परिसरात राहणारे राहुल पाटील (नाव बदलले आहे) खासगी कंपनीमध्ये काम करतात. २०२२ च्या डिसेंबरमध्ये त्यांना ली नाना या अनोळखी महिलेचा एसएमएस आला. तिने राहुल यांना संपूर्ण माहिती विचारत त्यांच्याशी ओळख केली. नंतर ती मैत्री करत त्यांच्याशी व्हॉट्सअॅपवर चॅटिंग करू लागली. काही दिवसांनी तिने त्यांना बिटकॉइनमध्ये गुंतवणूक करण्याविषयी सांगून ऑनलाइन खाते उघडण्यास भाग पाडले. या खात्यामध्ये तिने नऊ हजार रुपये भरण्यास सांगितले. त्यानुसार राहुल यांनी पैसे भरले. संबधित महिलेने आणखीन ४० हजारांची मागणी केली. पेमेंट लिकंद्वारे त्यांनी ४० हजार रुपये ऑनलाइन पाठवले. महिलेने त्यांच्या खात्यामधून ट्रेंडिग करत असल्याचे दाखवत नुकसान होत असल्याचा भास निर्माण केला. चांगला फायदा हवा असल्याच जास्त रकमेची गुंतवणूक करावी लागेल, असेही तिने राहुल यांना सांगितले होते. त्यामुळे त्यांनी आणखी एक लाख रुपये खात्यावर पाठवले. पैसे मिळाल्यानंतर महिलेने २९ हजार ८७३ डॉलरचा फायदा झाल्याचे दाखवले. परंतु, हा फायदा तत्काळ काढून घेण्यासाठी ४ लाख ८५ हजार रुपयांचा कर भरावा लागेल, असेही सांगितल्याने राहुल यांनी क्रेडिट कार्डवरून कर्ज काढत महिलेने दिलेल्या लिंकवर पैसे पाठवले.