आलिशान कार वापरण्याची हौस असलेल्या उद्योजकांना हेरून त्यांना एका तोतया अधिकाऱ्याने दहा लाख रुपयांचा गंडा घातला आहे. आपण एका नामांकित कंपनीत अधिकारी तसेच दक्षिण-पूर्व आशिया विक्री क्षेत्राचा सहाय्यक उपाध्यक्ष असल्याचे भासवून निम्म्या किंमतीत ‘बीएमडब्ल्यू’ देण्याचा दावा संशयिताने केला. या प्रलोभनाची भूरळ पडल्याने दोन उद्योजकांनी दहा लाख रूपये संशयिताला दिले. मात्र, चार महिने उलटूनही व्यवहार न झाल्याने संशयित अमितकुमार घोषविरुद्ध गंगापूर पोलिसांत फसवणुकीचा गुन्हा दाखल झाला आहे.
नुकतेच द्वारका परिसरातील एका डॉक्टरला दुबईतल्या चर्चासत्रासाठी नामांकित कंपनीच्या नावाने सहा लाखांचा गंडा घातला गेला. आता उद्योजकाला आलिशान कारच्या आमीषातून फसविण्यात आले. याबाबत उद्योजक चेतन मारूती प्रभू (वय ३३ रा. नंद गोकुळ, शंकरनगर) यांनी संशयिताविरुद्ध गंगापूर पोलिसांत तक्रार दिली आहे. संशयित घोष याने ‘बीएमडब्ल्यू’च्या दुसऱ्या सिरिजमधील आलिशान कार ५५ टक्क्यांत खरेदी करून देण्याचे प्रलोभन दाखवले. यानुसार प्रभू यांन २९ एप्रिल रोजी पाच लाख रुपये संशयिताच्या खात्यात वळते केले. यानंतर प्रभू यांचे मित्र उद्योजक अरुण कुमार दाणा यांनी तत्पूर्वी ११ एप्रिल रोजी चार लाख रुपये वळते केले होते. यानंतर संशयिताच्या पत्नीला ५० हजार रोख आणि ५० हजार ई-स्वरुपात देण्यात आले. एकूण दहा लाख रुपयांचा व्यवहार ११ ते २९ एप्रिल २०२२ पर्यंत झाला. मात्र, यानंतर संशयित घोष याने कोणताही व्यवहार केला नाही.चार महिन्यांनी तक्रार
शिवाय प्रभू यांना आलिशान कारसंदर्भातील कागदपत्रे अथवा व्यवहारांची माहिती दिली नाही. यामुळे चार महिन्यांनी प्रभू यांनी पोलिसांत तक्रार दिली. याप्रकरणी उपनिरीक्षक संजय भिसे यांच्याकडे तपास देण्यात आला आहे. संशयितांचा माग काढण्यात येत असून, कोणत्याही पदावर नसताना खोटी बतावणी करून फसवणूक झाल्याची माहिती भिसे यांनी दिली. मात्र, या घटनेमुळे उद्योग क्षेत्रात खळबळ उडाली आहे.
असे आहे ‘कनेक्शन’
संशयित घोष याची पत्नी बिपाशा भौमिक ही उद्योजक अरुणकुमार दाणा यांच्या परिचित आहे. फिर्यादी प्रभू हे दाणा यांचे स्नेही असून, भौमिकच्या ओळखीतून संशयिताशी या दोन्ही उद्योजकांचा परिचय झाला. संशयिताच्या पत्नीला ओळखत असल्याने दोघांनीही त्यांच्या प्रलोभनावर विश्वास ठेवला. परंतु, त्यातूनच फसवणूक झाल्याचे उघड झाले असून, पोलिस आता दोघांचा शोध घेत आहेत.