पती व त्याच्या नातेवाइकांना मारहाण करून पत्नीने दोन अपत्यांसह पलायन केले. ही खळबळजनक घटना सावनेर पोलिस स्टेशनअंतर्गत येणाऱ्या तेलकामठी येथे मंगळवारी रात्री घडली.
निरंजन हरिमण पाटील (वय ३९) यांनी दिलेल्या तक्रारीवरून सावनेर पोलिसांनी निरंजनची पत्नी निकिता, सासू माया व अन्य चौघांविरुद्ध गैरकायद्याची मंडळी जमवून मारहाण केल्याचा गुन्हा दाखल केला.
पोलिसांनी दिलेल्या माहितीनुसार, कौटुंबिक कलहातून गेल्या नऊ महिन्यांपासून निकिता या नागपुरात माहेरी राहतात. त्यांना दोन अपत्ये आहेत. दोघेही निरंजन यांच्यासोबत राहातात. मंगळवारी रात्री निकिता, तिची आई माया व अन्य चौघे तेलकामठी येथे आले. ते निरंजन यांच्या घरात घुसले. मुलगा व मुलीला घेऊन जायला लागले. निरंजन व त्यांचा पुतण्या आकाश या दोघांनी त्यांना विरोध केला. सहा जणांनी निरंजन यांना शिवीगाळ करून मारहाण केली. तसेच घरासमोरील ऑटो व सायकलची तोडफोड केली. मुलगा व मुलीला घेऊन निकिता साथीदारांसह पसार झाली. या घटनेने परिसरात काही काळ तणाव निर्माण झाला होता. निरंजन यांनी सावनेर पोलिस स्टेशन गाठून तक्रार केली. पोलिसांनी गुन्हा दाखल करून तपास सुरू केला आहे.