नवी मुंबईतील दिघा परिसरात एका दलित तरुणीवर लैंगिक अत्याचार झाल्याची घटना उघडकीस आली आहे. या घटनेतील पीडित तरुणीवर मागील १० वर्षे लैंगिक अत्याचार करणाऱ्या नराधमाने या तरुणीला आपल्या मित्रासोबत शरीरसंबध करण्यास भाग पाडल्याचे उघड झाले आहे. मित्रासोबतचे तिचे आक्षेपार्ह फोटो तसेच व्हिडीओ काढून तिला ब्लॅकमेल करून त्याने तिच्यावर अनेकदा जबरदस्तीने लैंगिक अत्याचार केले. हरिओम डडवाल (२७) असे या आरोपीचे नाव असून रबाळे एमआयडीसी पोलिसांनी त्याच्याविरोधात बलात्कारासह अॅट्रॉसिटी कायदा व इतर कलमांखाली गुन्हा दाखल करून त्याचा शोध सुरू केला आहे.
हा आरोपी हा दिघा परिसरातील एका राजकीय नेत्याचा अत्यंत जवळचा कार्यकर्ता असल्याचे समजते. या घटनेतील पीडित तरुणी दिघा परिसरात कुटुंबासह राहण्यास असून ती सध्या ठाण्यात एका खासगी कंपनीत कामाला आहे. २०१२ मध्ये पीडित तरुणी महाविद्यालयीन शिक्षण घेत असताना, त्याच परिसरात राहाणाऱ्या या नराधमाने फेसबुकच्या माध्यमातून ओळख वाढवून तिच्यासोबत मैत्री केली होती. लग्न करण्याचे आश्वासन देऊन त्याने तिचा विश्वास संपादन केला. त्यानंतर आरोपीने तिला मित्राच्या घरी नेऊन तिच्यासोबत शरीरसंबध प्रस्थापित केले. हे संबंध तीन वर्षे सुरू होते. या तरुणीने लग्नाबाबत विचारणा केल्यानंतर आरोपी टाळाटाळ करू लागला. त्यामुळे त्यांच्यात वाद होऊ लागले.
राजकीय दबाव फोल
डडवाल हा दिघा परिसरातील एका राजकीय नेत्याचा जवळचा कार्यकर्ता आहे. त्यामुळे या नेत्याने आपले राजकीय वजन वापरून डडवालवर गुन्हा दाखल होऊ नये यासाठी पोलिसांवर दबाव आणण्याचा प्रयत्न केला. मात्र पोलिसांनी कुठल्याही दबावाला बळी न पडता आरोपीविरोधात गुन्हा दाखल केला. हा आरोपी सध्या फरार आहे.