नोकरी देण्याचे आमिष दाखवत ४७ वर्षीय कृष्णमोहन तिवारी याला बोलावून त्याला लुटून त्याच्या डोक्यात कोयत्याने प्रहार करत, त्याची हत्या करत त्याला रस्त्यात फेकून देणाऱ्या चौघांना मानपाडा पोलिसांनी ७२ तासांत अटक केली. रिहान शेख, सागर चंद्रमौली पोन्नाला, सुमित सोनवणे आणि एक डिल्पोमा इंजिनीअर अल्पवयीन तरुण अशी आरोपींची नावे आहेत.
मॅकेनिकल इंजिनिअर असलेला कृष्णमोहन तिवारी कतार देशात नोकरी करत होता, मात्र लॉकडाउन काळात त्याची नोकरी सुटल्याने तो मायदेशी परतला होता. मागील दीड वर्षे हातात काम नसल्याने पत्नी आणि दोन मुलांचा सांभाळ कसा करायचा, या विवंचनेत असलेल्या कृष्णमोहन याला दिवा परिसरात असलेल्या ‘जॉब रिक्रेट रिक्रुटमेंट’ या प्लेसमेंटची माहिती मिळाली. त्याने या प्लेसमेंटकडे नोकरीसाठी अर्ज केला होता. या अर्जानुसार रिहान शेख याने कृष्णमोहनला सुरक्षा रक्षकाची नोकरी देण्याचे आमिष दाखवत ११ सप्टेंबर रोजी दुपारच्या सुमारास ठाकुर्ली स्थानकात बोलावून घेतले. ठाकुर्ली स्थानकातून सुमित सोनवणे या तरुणाने त्याला रिक्षात बसवून कचोरे परिसरातील कार्यालयात बोलावल्याचे सांगितले. यानंतर या रिक्षात रिहान शेख, सागर पोन्नाला आणि अल्पवयीन तरुण असे चौघेजण बसले. या चौघांनी त्याला डोंबिवली एमआयडीसी भागातील निर्जन स्थळी नेत त्याच्याकडील पैसे काढून घेतले, मात्र त्याने विरोध करताच या आरोपींनी त्यांच्याकडे असलेल्या लोखंडी रॉड आणि कोयत्याने त्याच्या डोक्यावर वार करत त्याला जखमी केले. यानंतर कचोरे परिसरातून येणाऱ्या निर्जन रस्त्यावर त्याला रिक्षातून ढकलून देत या चौकडीने पोबारा केला. वाहतूक पोलिसांना जखमी अवस्थेत सापडलेल्या कृष्णमोहन याची त्याच्या खिशातील आधारकार्डवरून ओळख पटवून पोलिसांनी त्याला रुग्णालयात दाखल केले, मात्र १३ सप्टेंबर रोजी त्याचा उपचारादरम्यान मृत्यू झाला. या प्रकरणाचा तपास करताना पोलिसांना हत्येचा संशय आल्याने मानपाडा पोलिस ठाणे गुन्हे विभागाचे पोलिस निरीक्षक बाळासाहेब पवार, सहाय्यक पोलिस निरीक्षक अनिल भिसे, अविनाश वणवे आणि पथकाने कृष्णमोहन याला आलेल्या शेवटच्या कॉलचा तसेच स्थानक परिसरातील सीसीटीव्हीच्या आधारे रिहान शेख याचा माग काढत त्याला ताब्यात घेत ७२ तासांत या प्रकरणाचा उलगडा केला आणि चारही आरोपींना अटक केली. न्यायालयाने आरोपींना पोलिस कोठडी ठोठावल्याचे पोलिस उपायुक्त विवेक पानसरे यांनी सांगितले.