कोरोनाच्या सध्याची परिस्थिती पाहता मुंबईच्या महापौर किशोरी पेडणेकर यांनी लोकांना हात जोडून ‘डबल मास्क’ घालण्याचे आवाहन केले आहे. महापौर किशोरी पेडणेकर यांच्या व्यतिरिक्त ‘मुंबई महानगरपालिका’ यांनीही आपल्या ट्वीटर हँडलवर डबल मास्क वापरण्याचे आवाहन केले आहे. या आवाहनात असे म्हटले आहे की, आधी चेहऱ्यावर सूती मास्क लावा आणि मग त्यावर सर्जिकल मास्क लावा.
बीएमसीने आपल्या ‘मायबीएमसी’ ट्वीटर हँडलद्वारे ट्वीटवर असा दावा केला आहे की, एन -95 मास्क किंवा सर्जिकल मास्कमुळे कोरोनापासून 95% संरक्षण होते. तर कॉटन मास्कमुळे आपले 0% संरक्षण होते. त्यावर यूझर्सनी बीएमसीला प्रश्न विचारला की, बीएमसी कोणत्या आधारावर असा दावा करत आहे की, कॉटन मास्क 0% संरक्षण देतो आणि ए -95 मास्क किंवा सर्जिकल मास्क 95% सुरक्षित आहे?
लोकांचं असं म्हणणे आहे की, बीएमसी एन -95 मास्कची जाहिरात करत आहे का? काही नागरिकांचे म्हणणे आहे की, एक मास्क घातल्यामुळे काही लोकांना गुदमरल्यासारखे वाटते, तर असा परिस्थितीत दोन मास्क कसे घालता येणार? यावर मुंबई महानगरपालिकेचे अतिरिक्त आयुक्त सुरेश काकाणी यांचे म्हणणे आहे की, सूती कपड्याचे मास्कही सुरक्षित आहेत. परंतु बरेच लोक चेहऱ्यावरुन काढून टाकतात आणि त्याला योग्यरीत्या वापरत देखील नाही. म्हणून, डबल मास्क लावणे महत्वाचे आहे.
काही तज्ञांचे मत आहे की, सूती मास्क इतरांपेक्षा आपल्यासाठी अधिक प्रभावी आहे. परंतु आपल्याला कोरोना विषाणूपासून संपूर्ण संरक्षण देण्यात सक्षम तो नाही. यासाठी एकतर सर्जिकल मास्क लावावा किंवा एन-95 मास्क वापरावा.